U rrëzua në mes të ushtrimit të tij në hekurin horizontal, duke dështuar të bëjë kapjen dhe duke përfunduar tashmë jashtë Lojërave që zhvillohen në shtëpi. E drama e tij sportive është bërë një dramë e të gjithë Japonisë. Kohei Uchimura, kampioni olimpik në Londër 2012 dhe Rio 2016 me një rezultat të përsëritur që për meshkuj nuk ndodhte prej 44 vjetësh, e me pesë medalje të tjera olimpike në karrierë dhe sipas shumë opinionistëve, gjimnasti më i fortë i të gjitha kohërave, është jashtë Tokio 2020, duke treguar një gjendje që nuk është më ajo e kohërave të mira. Në Japoni vetëm patinatori Yuzuru Hanyu është po aq i vlerësuar sa ai, por mbreti Kohei, në këtë pikë, në moshën 32 vjeçare, mund të ketë marrë rrugën e perëndimit.
Asnjë finale, nuk bëhet fjalë. Uchimura përfundoi rutinën, mori disa duartrokitje dashamirëse (edhe Ariake Center është natyrisht pa publik), bëri gjestin përshëndetës për gjyqtarët, mori 13,866 pikët e tij të trishta dhe u largua nga skena. Edhe kualifikimin gjimnasti japonez e siguroi nga dera dytësore, in-extremis dhe vetëm pas një play-off, ndërsa tani i lodhur dhe i dëmtuar në shpinë dhe në pamundësi për të gjetur stilin që e kishte bërë unik, ai ngriti flamurin e bardhë. Në javët përpara Lojërave, ai tashmë kishte lënë të kuptohet se kjo mund të ishte gara e fundit. E kaluara nuk është fshirë, karriera mbetet e lavdishme. Por një mbretëri në Tokio është shembur.