“Kylian është stërvitur shumë mirë, si zakonisht. Është i grumbulluar për nesër. Nëse më ka lajmëruar për qëllimin e tij për t’u larguar? Jo”. Me këto fjalë Mauricio Pochettino, trajneri i PSG-së, ka sqaruar mbi situatën e Mbappe, që mund të transferohet te Real Madrid. “Presidenti ynë dhe drejtori sportiv tashmë e kanë sqaruar situatën”, shpjegoi trajneri në një konferencë shtypi në prag të ndeshjes kundër Reims.
Për përforcimin e fundit Lionel Messi, tekniku argjentinas shtoi: “Siç e dimë, ai është një profesionist i madh, po përshtatet shumë shpejt me shokët e tij të skuadrës, me klubin, është një lojtar i madh”. Për ndeshjen kundër Reims, Pochettino ka grumbulluar, përveç Mbappes dhe kampionit argjentinas, edhe Neymar: “Nuk kam vendosur plotësisht se kush do të luajë akoma, do të shohim nëse të tre mund të luajnë që nga fillimi i ndeshjes.” PSG kryeson në Ligue 1, me tre fitore në tre ndeshje dhe nesër do të shkojë në kërkim të suksesit të katërt.