Në fillim Polonia, pastaj Hungaria e San Marino: tre ndeshjet e shtatorit mund të vendosin shumë për objektivin kualifikim të Shqipërisë në fushatën kualifikuese të Katar 2022. E megjithatë, pas një humbje e dy fitoresh, ndeshja e katërt, ajo kundër Polonisë, mund të jetë kruciale për fatet e skuadrës së Edoardo Rejas. I këtij mendimi është edhe Albi Doka, mbrojtësi i kombëtares, që po fillon të fitojë kredite në hierarkinë e teknikut italian: “Kemi tre ndeshje, por duhet të fokusohemi te ndeshja me Poloninë, sepse nëse ia dalim në këtë ndeshje, dy të tjerat i kemi në shtëpi dhe do kemi edhe mbështetjen e tifozëve. Besoj se do marrim një rezultat të mirë. Polonia është ekipi më i fortë që kemi, por ne nuk duhet t’i trembemi me këtë grup lojtarësh që kemi. Jam me fat që stërvitem me këta lojtarë”.
Pas prezantimit historik në finalet e një kampionati Europian, tani synimi është një shfaqje e parë edhe në një Botëror. Nuk është aspak e lehtë, duke patur parasysh edhe përbërjen e Grupit I me Anglinë superfavorite, Poloninë e Hungarinë, por një përsëritje e Euro 2016 është ngacmimi më i madh për kuqezinjtë, sic e zbulon ish-mbrojtësi i Tiranës: “Përsëritje e arritjes së Kombëtares në 2016? Normale që e mendojmë me njëri-tjetrin dhe e bisedojmë. Duhet ta ëndërrojmë atë gjë sepse prandaj jemi këtu, për të arritur atë qëllim”.
https://youtu.be/HfC1EESZFDc