Dy persona kanë rënë në prangat e policisë së Kurbinit, pasi akuzohen për kultivim kanabisi. Burime zyrtare bënë me dije se pas hekurave përfunduan shtetasit me inicialet P. M., 29 vjeç dhe M. M., 24 vjeç, banues në Ferrë Trashë të Mamurrasit.
Këta shtetas janë kapur në kushtet e flagrancës, duke kultivuar bimë narkotike në afërsi të banesës së tyre, në vendin e quajtur “Ferrë Trashë”, Njësia Administrative Mamurras, Kurbin. Në vijim të veprimeve hetimore filloi procedimi penal në gjendje të lirë për shtetasin M. K., 59 vjeç, me detyrë kryetar i fshatit Ferrë Trashë, pasi dyshohet se ka konsumuar elementë të veprës penale “Shpërdorim detyre.
Materialet procedurale u referuan në Prokurorinë pranë Gjykatës së Shkallës së Parë Kurbin, për veprat penale “Kultivim i bimëve narkotike”, kryer në bashkëpunim dhe “Moskallëzimi i krimit “.