Konglomerati luksoz i modës që qëndron pas markave si Gucci, Yves Saint Laurent, Alexander McQueen dhe Balenciaga ka ndaluar përdorimin e gëzofit të kafshëve në të gjitha markat e tij deri në vjeshtën e vitit 2022.
“Koha tani ka ardhur,” tha CEO i Kering dhe kryetari François-Henri Pinault, në një deklaratë të shkurtër të publikuar dje. “Bota ka ndryshuar, së bashku me klientët tanë, dhe luksi natyrisht duhet t’i përshtatet asaj. Kur bëhet fjalë për mirëqenien e kafshëve, grupi ynë ka treguar gjithmonë gatishmërinë e tij për të përmirësuar praktikat brenda zinxhirit të tij të furnizimit dhe sektorit të luksit në përgjithësi.”
Në vitin 2017, Gucci u bë shtëpia e parë e modës në Kering që u angazhua për të eliminuar gëzofin nga modelet e tyre, duke theksuar përgjegjësinë shoqërore si një nga vlerat kryesore të markës. Markat e tjera, përfshirë Balenciaga, Alexander McQueen dhe Bottega Veneta, gjithashtu kanë hequr dorë tashmë nga gëzofi.
Presioni ndaj markave për të ndërmarrë veprime të mëtejshme kundër mizorisë ndaj kafshëve është rritur për vite me radhë. Në fillim të këtij muaji, bashkautorja e Met Gala, Billie Eilish, negocioi një premtim për mospërdorimin e gëzofit nga marka amerikane Oscar de la Renta në këmbim të paraqitjes me veshjet e tyre në tapetin e kuq.
“Unë jam shumë e emocionuar që i gjithë ekipi (Oscar de la Renta) më dëgjoi për këtë çështje dhe tani kanë bërë një ndryshim që sjell një ndikim për të mirën më të madhe, jo vetëm për kafshët, por edhe për planetin dhe mjedisin tonë gjithashtu. Unë u bëj thirrje të gjithë stilistëve të bëjnë të njëjtën gjë,” -shkroi Eilish në Instagram.
Chanel dhe Prada gjithashtu njoftuan se do të ndalonin përdorimin e gëzofit, respektivisht në vitet 2018 dhe 2019.