Momente terrori të vërtetë në shtëpinë në Nisë të Mario Lemina, ish-mesfushorit të Juventus i cili, në kohën kur ndodhi ngjarja, ishte i zënë me ekipin kombëtar të Gabonit në ndeshjet kualifikuese për Kupën e Botës 2022. Sipas asaj që u raportua nga gazeta franceze L’Équipe, të dielën mbrëmje tre kriminelë, me kapuç dhe të armatosur me pistoleta, kanë hyrë në shtëpinë e lojtarit dhe kanë kërcënuar dhe lidhur tre vajzat e pranishme, përfshirë partneren e Lemina, Fanny Neguesha, ish-e dashura e Mario Balotellit.
Keqbërësit dyshohet se kanë grabitur bizhuteri, veshje dhe artikuj prej lëkure për një vlerë totale prej rreth 300,000 euro. Lemina, shumë i tronditur, i ka kërkuar ndërkohë, trajnerit Patrice Neveu të mos luante ndeshjen e ardhshme kualifikuese në Katar 2022 kundër Angolës.
