Detaje të reja zbardhen nga sasia e kokainës i kapur sot në Portin e Durrësit, e cila është gjetur sërish në kontenierët e kompanisë “Alba Exotic Fruit”. Është e pesta herë radhazi, që nga muaji korrik i këtij viti, që policia kap sasi kokaine të ardhura nga Ekuadori, pikërisht nga kontenierët e kësaj kompanie.
Ditën e sotme, policia njofton se ka sekuestruar sasinë prej 10 kg e 185 gramë kokainë, që siç raporton gazetarja Klodjana Haxhiaj, trafikantët e kishin fshehur në kapakët e motorëve frigoriferikë të kontenierëve me banane.
Gazetarja Haxhiaj thekson se kontenierët kanë mbërritur pak ditë më parë në Portin e Durrësit. Ndërkohë, burime nga policia bëjnë me dije për gazetaren Haxhiaj se të gjithë kontenierët që mbërrijnë për llogari të kësaj firme, i nënshtrohen kontrolleve të imtësishme.
Nga hetimet e deritanishme, dyshohet se kemi të bëjmë me një grup kriminal, që vijon të sjellë në vendin tonë sasi të ndryshme kokaine me kontenierë.