Massimiliano Allegri po përgatitet për ndeshjen e Ligës së Kampionëve kundër Zenit me dy synime të qarta në mendje: nga njëra anë të sigurojë kualifikimin aritmetik për në 1/8 për të cilën mjafton vetëm një pikë, nga ana tjetër të gjejë përgjigje nga skuadra e tij pas humbjeve të rënda në kampionat kundër Sassuolos dhe Veronës: “Kualifikimi është objektivi i parë i sezonit, ta arrijmë dy ndeshje më herët do të ishte mirë, do të na lejonte të përqendroheshim në kampionat – ka komentuar trajneri i Juventusit në konferencën për shtyp -. Në këtë moment jemi të gjithë të inatosur dhe na vjen keq, sepse për pesë ditë hodhëm në det atë që kishim ndërtuar në një muaj e gjysmë. Kjo duhet të na bëjë të reflektojmë dhe duhet të punojmë për t’u përmirësuar”.
Të padisponueshëm për ndeshjen e Champions janë vetëm De Sciglio, Kean e Ramsey. Sipas asaj që ka në plan tekniku, me rikuperimin e Chiesa dhe de Ligt, bardhezinjtë do të jenë më vibrues, por nuk duket se Allegri do të ndryshojë rreshtimin e të tijve: “Nëse do të kisha garancinë se duke luajtur me 3 do të fitonim të gjitha ndeshjet do ta bëja, do të kaloja edhe me 7 prapa nëse do të më garantonte që të mos pësoja kurrë gol. E vërteta është se është çështje fazash, duhet të përmirësohemi në momente të ndryshme të ndeshjes. Edhe në Shën Petersburg nuk luajtëm një fazë shumë të mirë mbrojtëse, u lamë shumë mundësi të favorshme, duhet të ngremë antenat kundër kësaj lloj skuadre. Shifrat janë të pakundërshtueshme dhe prej atyre nuk ka shpëtim”.