“Nuk mund ta them se çfarë kam ndryshuar, atë që kam bërë e kam bërë sipas mënyrës time. Të them që nuk jam i kënaqur dal si hipokrit, jam shumë i kënaqur nga skuadra. Problemet në skuadër duhet ti hedh mënjanë për të parë edhe për ndeshjet e ardhshme”. Mirel Josa po shijon momentin dhe efektin që ka bërë ardhja e tij në pankinën e Lacit. Skuadra e tij vazhdon të fitojë, duke fituar terren në raport me kreun, edhe pse Tirana për momentin duket e paarritshme.
Spostimi taktik i Mazrekajt e ka kthyer wingerin në protagonist në radhët e kurbinasve, që Josa mundohet të shpjegojë. Në fakt, me lojtarin ka një raport të vjetër, që është kthyer të lulëzojë me ardhjen e tij te bardhezinjtë: “Lushkja duhet të luajë më i avancuar ka dhe kontroll topi, ndërhyrje në zonën e kundërshtarit. Mazrekaj luan në krah, e kërkon topin në pozicion dhe di të shërbejë shumë mirë. Unë Mentorin e kam pasur edhe te Prishtina që kemi qenë së bashku dhe e njoh shumë mirë. Unë kam objektivat e mia personale që i bashkangjis objektivat e klubit”.
Tani zona europiane është e mundshme dhe Josa insiston aty, pa hequr sytë nga kreu: “Për të përmirësuar skuadrën unë kam syninimin tim. Unë dua që ta përgatis skuadrën sa më mirë dhe për ta fituar ndeshjen e radhës”, përfundoi tekniku I kurbinasve.