Nuk është emri që shpresonin e, megjithatë, Newcastle United ka një trajner të ri. Klubi ka shpallur pasardhësin e Steve Bruce dhe ky është Eddie Howe. Trajneri, i cili ishte pushim që nga viti 2020 pas rënies me Bournemouth, ka nënshkruar kontratë deri në verën e vitit 2024. Tekniku i ri ka dhënë edhe deklaratat e para, raportohet në faqen zyrtare të klubit. “Për mua është një nder i madh të bëhem trajner i një klubi me statusin dhe historinë e Newcastle United. Është një ditë shumë e rëndësishme. Jam krenar për veten dhe familjen time. Kjo është një mundësi e mrekullueshme, por jam i vetëdijshëm për punën e madhe që na pret. Dua të falënderoj pronarët e klubit për këtë mundësi dhe të falënderoj tifozët e klubit për pritjen e pabesueshme që më kanë bërë tashmë. Jam shumë entuziast dhe mezi pres të fillojmë rrugëtimin tonë së bashku”.
Howe, sic duket, gëzon vlerësimin e Amanda Staveley, pavarësisht se zgjedhja e tij erdhi pasi askush nga trajnerët e mëdhenj nuk pranoi të ulej në pankinën e Magpies. “Na la shumë përshtypje Howe. Përveç arritjeve të tij në krye të Bournemouth, ku u bë protagonist i rritjes dhe transformimit të klubit, ai është një trajner pasionant dhe dinamik që ka ide të qarta se si ta çojë përpara këtë ekip. E konsiderojmë profilin ideal për atë që po përpiqemi të ndërtojmë këtu”.
Situata e Newcastle, pavarësisht ambicjeve të pronësisë së re, nuk është e lehtë. Skuadra mban vendin e nëntëmbëdhjetë në renditje me pesë pikë distancë nga zona e shpëtimit, pas 11 ndeshjeve të para. Howe, megjithatë, tashmë është i specializuar në bëmat e bujshme: në krye të Bournemouth ai mbërriti në Premier League duke filluar nga divizioni i tretë anglez dhe arriti të mbajë ekipin e tij në elitën e futbollit anglez për pesë sezone nga 2015 deri në 2020. As sa mjafton për të ngjallur besim te Alan Shearer, i cili tashmë e ka duartrokitur zgjedhjen, siç raportohet nga BBC. “Një zgjedhje e mençur. Hoëe është një trajner i ri që ka përvojë të mirë në Premier League dhe di shumë mirë se si të lëvizë në atë zonë të tabelës. Newcastle do të kthehet të jetë protagonist me të.”