Akuza shumë të rënda varen mbi klubin më të suksesshëm në Itali, Juventus, pasi Prokuroria Publike e Torinos hapi zyrtarisht një hetim që përfshin të gjithë drejtuesit e Juventusit (nga Agnelli deri te zv.presidenti Pavel Nedved) nën hetim për kontabilitet të rremë dhe lëshim faturash për transaksione jo ekzistuese. E thekson këtë Codacons, duke konsideruar se është “një kuti e vërtetë e Pandorës, duke pasur parasysh se vitet e fundit shumë operacione që përfshinin klubin e Juventusit kishin bërë që tifozët dhe opinionistët e futbollit të mos i pëlqenin”.
“Në veçanti, nën akuzë janë plusvalencat në merkato dhe tarifat e paguara ndaj menaxherëve, të regjistruara në buxhetet e tre sezoneve sportive, nga ai i përfunduar më 30 qershor 2019 deri në atë të fundit, që ka përfunduar më 30 qershor të këtij viti. Në total – nënvizon shoqata e konsumatorëve – ka fitime kapitale prej 282 milionë eurosh në tre vjet ‘të karakterizuara nga rritja e vlerave përmes mashtrimit’, sipas Prokurorisë; mbi cështjen ishte hapur një hetim nga Consob, Komisioni që mbikëqyr shoqëritë e kuotuara në Bursë, që filloi në 12 korrik.
“Sistemi akuzues është shumë serioz dhe hedh dritë mbi kampionatet e fundit të futbollit edhe sepse, siç e dimë, ka pasur një dominim të vërtetë të Juventusit në vitet e fundit, i cili përfundoi vitin e kaluar – thotë presidenti i Codacons, Marco Donzelli – Nëse Juventusi do të ishte avantazhuar në mënyrë të paligjshme ndaj klubeve rivale me operacione të këtij lloji, atëherë rregullsia e kampionateve të fundit të futbollit do të dështonte dhe, si pasojë, Federata dhe Autoriteti i Konkurrencës së Tregut duhet të ndërhyjnë dhe të sanksionojnë përgjegjësit. Përtej përgjegjësive individuale, klubi nuk do të përjashtohet nga ndëshkimi. Për këtë arsye dhe për të mbrojtur mijëra tifozë, ne do të paraqesim një ankesë në Antitrust dhe Prokurorinë Federale duke kërkuar rënien e klubit të Juventusit në Serie B dhe revokimin e titujve të fundit të kampionatit, të fituara me hijen e këtyre operacioneve potencialisht të paligjshme”.