Cristiano Ronaldo ka shpërthyer zemërimin e tij e në shënjestër ka Pascal Ferré, kryeredaktorin e France Football, revista që dorëzon Topin e Artë. “Ronaldo ka vetëm një ambicie dhe ajo është të mbyllë karrierën e tij me më shumë Topa të Artë se Messi, e di sepse ma ka thënë”, deklaroi Ferré disa ditë më parë. Po ai, në lidhje me mungesën e portugezit në ceremoninë në Paris ka folur për “gjoja karantinë.” Por në momentin e dhënies së çmimit prestigjioz, të cilën e ka fituar pesë herë, CR7 ka dashur të sqarojë gjithçka me një postim në Instagram.
“Gjithmonë dua t’i përgëzoj ata që fitojnë, brenda sportit dhe lojës së ndershme që e kanë udhëhequr karrierën time që në fillim dhe e bëj sepse nuk jam kurrë kundër askujt. Unë fitoj gjithmonë për veten time dhe për klubet që përfaqësoj, fitoj për ata që më duan të mirën – ka shkruar portugezi – Unë nuk fitoj kundër askujt. Ambicia më e madhe e karrierës sime është të fitoj tituj kombëtarë dhe ndërkombëtarë për klubet që përfaqësoj dhe për kombëtaren e vendit tim “.
Dhe sërish: “Ambicia më e madhe e karrierës sime është të jem shembull i mirë për të gjithë ata që janë apo duan të jenë futbollistë profesionistë. Ambicia më e madhe e karrierës sime është të lë emrin tim të shkruar me shkronja të arta në historinë e futbollit botëror. Është e papranueshme që personi përgjegjës për dhënien e një çmimi të tillë prestigjioz mund të gënjejë në këtë mënyrë, me mungesë respekti absolut për atë që ka respektuar gjithmonë France Football dhe Topin e Artë. Dhe ai gënjeu përsëri sot, duke justifikuar mungesën time në Gala me një karantinë të supozuar që nuk ka arsye të ekzistojë”.