Tani është zyrtare, Tottenhami është jashtë Ligës së Konferencës. Në fakt, Uefa njoftoi humbjen 0-3 në tavolinë të skuadrës së Antonio Contes ndaj Rennes në ndeshjen e pa luajtur më 9 dhjetor, për shkak të shumë rasteve pozitive me Covid në skuadrën e Spurs dhe kështu Tottenham e përfundon grupin G, në mënyrë befasuese, në vendin e tretë, pas francezëve dhe Vitesses, vetëm para NK Mura (hollandezët do të përballen me Rapid Vjenën në playoffin e planifikuar për në shkurt).
Në një njoftim për shtyp të UEFA-s thuhet se “Presidenti i Apelit të UEFA-s ka marrë vendimin e mëposhtëm: të shpallë ndeshjen e fazës së grupeve të Konferencës së Ligës 2021/22 midis Tottenham Hotspur FC dhe Stade Rennais FC, e planifikuar fillimisht për më 9 dhjetor 2021, të anulluar nga Tottenham Hotspur FC, të cilët për këtë arsye mendohet se kanë humbur 0-3 në përputhje me nenin J.3.1 të Rregullave të Ligës së Konferencës (Sezoni 2021/22)”.
Përcaktuese për përjashtimin e Spurs ishte pamundësia e përcaktimit të një date për rikuperim, sepse rregullorja e UEFA-s është e qartë: “Nëse nuk është e mundur të ricaktohet ndeshja, klubi që nuk mund ta luajë ndeshjen do të mbajë përgjegjësi për ndeshjen e paluajtur, që do të konsiderohet e humbur 3-0. Për më tepër, Komisioni i Kontrollit, Etikës dhe Disiplinës i UEFA-s mund të miratojë masa të mëtejshme disiplinore nëse rrethanat e justifikojnë atë”.
TOTTENHAM: “NA VJEN KEQ, POR E PRANOJMË”
“Na vjen keq për vendimin e komisionit të apelit të UEFA-s, i cili refuzoi të lejojë më shumë kohë që ndeshja të riluhet”. Me këtë shënim të publikuar nga klubi, Tottenham komenton vendimin e UEFA-s për t’i dhënë fitoren 3-0 Rennes, si pasojë e dështimit për të luajtur ndeshjen e Konferencës së Ligës, për shkak të një shpërthimi të Covid në grupin e ekipit londinez. “Megjithatë, ne duhet të pranojmë atë që është vendosur – vazhdon deklarata e Spurs – dhe tani vëmendja jonë është e përqendruar tërësisht në kompeticionet në të cilat jemi ende në garë”.