5 persona u qëlluan me armë zjarri mbrëmjen e së shtunës në Greqi në Voula, mes tyre 3 shqiptarë që mbetën të plagosur rëndë. Mediat greke shkruajnë se emra “të rëndë” të krimit kanë marrë pjesë në përplasjen e armatosur. Kamerat kapën autorët duke u larguar me vrap.
“Kathimerini” shkruan se një rol qendror në ngjarje ka pasur një “grupi zhvatës” duke identifikuar si motiv të mundshëm larjen e hesapeve nga trafiku i drogës. Shumica e të përfshirëve janë pjesë e rasteve të trafikut të drogës, grabitjeve dhe rrahjeve si pjesë e përfshirjes së tyre në grupin “Bravo”.
Një nga shqiptarët e plagosur u arrestua në prill 2018 për një sulm të armatosur ndaj punonjësve të policisë në Kallithea. Në sy të policisë i dyshuari kishte ikur me vrap dhe gjatë ndjekjes arma i kishte rënë në rrugë. Megjithatë, më vonë dhe ndërkohë që policia vazhdonte ta ndiqte ai kishte hapur zjarr ndaj tyre me një armë të dytë që posedonte. Ai u arrestua dhe 5 muaj më vonë u lirua.
Të shtunën, 3 persona, të gjithë shqiptarë, të moshës 36, 40 dhe 48 vjeç u qëlluan me armë në bark dhe gjoks. Në vendngjarje janë gjetur armë, thika dhe njolla gjaku. Dy persona të tjerë, një 33-vjeçar grek dhe një irakian 35-vjeçar, kanë mbetur të plagosur lehtë nga goditjet me thikë, grushte dhe shkelma.
Në informacion thuhet se ata ishin të njohur për shqiptarët dhe ndërhynë për t’i ndarë pa u sqaruar nëse prania e tyre në vendngjarje ka qenë aksidentale apo jo. Po sipas mediave greke kemi të bëjmë me përplasje për larje hesapesh për çështje droge.