Votimet në shoqata rajonale të FSHF kanë vazhduar dhe në Korçë. SHRF Korçë ka zgjedhur delegatët e saj për Asamblenë e Përgjithshme të FSHF-së, që mbahet më 2 mars. Përfaqësues me të drejtë vote në Asamblenë Kombëtare të Federatës Shqiptare të Futbollit është zgjedhur Roland Shkëlqimi. Krahas tij, një mandat të tillë ka edhe kryetari i kësaj shoqate Ilirian Përmeti, të cilit mandati i përfundon në fund të muajit qershor.
FSHF në njoftimin e bërë raporton edhe probleme: “Në këto punime morën pjesë delegatët e 5 anëtarëve të kësaj shoqate, nga 8 që janë në total. Këto 5 anëtarë u përfaqësuan në këtë mbledhje nga 7 delegatë. SHRF Korçë konstatoi me shqetësim se për zhvillimin e këtyre punimeve, përfaqësuesi i njërit prej dy delegatëve të KF Pogradeci nuk u lejua nga kryetari i Bashkisë Pogradec të merrte pjesë në këtë Asamble”, thuhet në njoftimin e FSHF.
Veç të tjerash raportohet se SHRF Korçe ka propozuar Armand Dukën si kandidat për president në FSHF, ndërsa Arben Dervishajn si kandidat për anëtar të Komitetit Ekzekutiv.