Humbja e parë për Çelën në pankinën e Kastriotit, që nuk arrin të dalë nga zona e rënies nga kategoria i mundur 0-1 nga Vllaznia, në një ndeshje që nuk i shpëtoi polemikave mbi 11 metërshin që e vendosi. Vendimtar Latifi nga pika e bardhë, ndërsa shkodranët e mbyllën me 10 lojtarë pas ndëshkimit me të kuq të Adilit.
Një pjesë e parë pa raste, ku skuadrat mendonin vetëm të gjenin hapësira pa rrezikuar gjë prapa, me ndikimin në mungesën e rendimentit në zonat kundërshtare. Skuadra e Brdaric e kishte të qartë që pa fitore rrezikonte ta shihte distancën me kreun të rritej e për më tepër, me përplasjen mes kryesuesve kishte nevojë për një fitore që të shpresonte të rikuperonte ndonjë pikë.
Kjo ndoshta karikoi edhe më shumë kuqeblutë, që pjesën e dytë e nisën me tjetër ritëm, duke e shtypur kundërshtarin në gjysëmfushën e tij. Krutanët shpresonin të riniseshin për të bërë keq në kundërsulm, por shkodranët luajtën me kujdes dhe rrezikuan me Latifin, në minutën e 46 me goditje dënimi dhe në të 53 me Krymin. Megjithë dominimin kuqeblu, duhej një penallti për të zhbllokuar ndeshjen, 11 metërsh që Beqiri nuk e dalloi që në fillim, por pas pamjeve filmike në VAR tregoi pikën e bardhë, duke tërbuar krutanët.
Vendosi Latifi me ftohtësinë e zakonshme nga 11 metra, Aralica humbi mundësinë për të mbyllur ndeshjen në të 89, ndërsa në fund si për ta bërë më të ethshme pritjen Adili mori kartonin e dytë të verdhë duke e lënë Vllazninë me 10 lojtarë. 30 pikë për Vllazninë, në vendin e katërt, por larg nga kreu. Në këtë pikë shpresa është që Tirana të humbasë pikë në përplasjen me Kukësin.
Polemika?! Penallti më të qartë nuk kam parë ndonjëherë. Nuk është vetëm 1 po dy lojtarë që bëjnë faull në zonë të rreptsësisë. Nga mënyra si hidhen para topit këta të Kastriotit duken si kamikazë.