• |
ide | kryesore

Një fantazmë blen portin e Durrësit

-Instant, Arkiva, Blog



Një javë më parë në sportelet e Qendrës Kombëtare të Biznesit mbërriti një aplikim. Dërguesi ishte Symphony Invest Limited, guaska e Muhamed Alabarit nga ishujt Cayman, që do të marrë koncesionin e Portit të Durrësit. Por në aplikim Symphony Invest Limited njoftonte se kishte shitur 100 për qind të kuotave tek një kompani e re.

Sipas dokumenteve, transaksioni i shitjes së kuotave të Symphony Invest Limited ka ndodhur në Ishujt Cayman në datën 23 dhjetor. QKB e studioi aplikimin për një javë. Një ditë më parë vendosi ta pezullojë atë duke mos e kryer regjistrimin për ndryshimin e kuotave. Arsyeja? Kompania e re që ka blerë aksionet e Symphony Invest Limited nuk dihet se çfarë është, nga vjen dhe se nga kush zotërohet.

QKB i ka kërkuar kompanisë së regjistruar në ishujt Cayman që të plotësojë dokumentacionin sipas kërkesave që dikton ligji, mes të tjerave të dorëzojë aktin e themelimit dhe dokumentet që vërtetojnë se kush janë pronarët e saj.

Në pezullim nuk bëhet e ditur se si quhet kompania e re që ka blerë kuotat e guaskës së Alabarit. Ndërkohë që po ashtu nuk dihet se cilët janë pronarët realë të saj, ndonëse fytyra publike e projektit vijon të mbetet gjithmonë Muhamed Alabar.

Madje, në datën 31 dhjetor kur shqiptarët festonin Vitin e Ri, kryeministri Edi Rama së bashku me Alabar organizuan një shfaqje me fishekzjarrë për të inauguruar projektin e Portit të Durrësit. Pak ditë më parë, qeveria shqiptare kishte miratuar vendimin, që i kaloi të gjitha pronat në zonën e Portit të Durrësit tek Ministria e Financave.

Konsolidimi i pronës në një dorë të vetme është hapi i parë drejt nënshkrimit të marrëveshjes që do t’i kalojë kompanisë Symphony Invest Limited mbi 85 hektarë tokë shtetërore falas në zonën e Portit të Durrësit. Më pas kompania do të ndërtojë aty portin e jahteve, pallate si dhe hotele. Sakaq në territor ka nisur çmontimi i portit të mallrave duke e zhvendosur aktivitetin portual në Porto Romano, tek porti privat që zotërohet nga grupi Kastrati.

Qeveria po vazhdon procedurat për të realizuar koncesionin e Portit të Durrësit. Por shitja e beftë e Symphony Invest Limited ngre më shumë se pikëpytje mbi projektin 2 miliardë dollarë të trumbetuar fort. Kush është fantazma që po merr 85 hektarë tokë shtetërore falas në Portin e Durrësit, një nga zonat më të lakmuara të bregdetit shqiptar? Cilët janë pronarët e rinj që kanë hyrë në lojë? Dhe çfarë po e shtyn Muhamed Alabarin, ish drejtuesin e grupit Emaar, që të kryejë manovra të tilla me shitje kuotash?

Investitorët seriozë që angazhohen në projekte të mëdha nuk shesin kuota koncesionare ende pa u miratuar projekti. Manovra të tilla ndodhin vetëm në dy raste. Së pari, kur investitorët nuk kanë para dhe duan të afrojnë në projekt aktorë të tjerë që sigurojnë financime. Dhe së dyti, kur duan të kalojnë një pjesë të llokmës tek vendimmarrësit lokalë. Pra të japin tarifën e rryshfetit.

Është ende herët të thuhet se çfarë është duke ndodhur saktësisht me koncesionin kontrovers të Portit të Durrësit. Por shitjet me pronarë sekret nëpër offshore e ekspozojnë rëndë këtë projekt si ndaj rreziqeve për korrupsion madhor ose pastrim masiv parash. /MCN TV



6 Comments

  1. Dhe yjet rrine e veshtrojne si tallin b.then cifti soroist edvon rama e linda basha duke pasuar maskaralleqet e Berishes qe per allishverishet me ca toka bujqesore ne Durres me Tadiç u permbys dynjaja.

  2. Shqiptaret duhet te jene te vemendshem e te lexojne keto qe shkruhen ne kete artikull.

    Po luhet me nje pasuri kombetare, po luhet me te ardhmen e femijeve.

    Edi Rama po e shet Shqiperine cope cope dhe interesat kombetare as qe i llogarit.

    Pushteti dhe pareja jane atdheu I tij.

    1. Me vjen keq, me dhemb ne shpirt ta thm por shqiptaret jane kokrra e karit. Kane votuar dike qe donte ti zevendesonte me Bangladeshas.
      Eshte e pa imagjinushme se si mund te rizgjidhet nje kryeminister i cili thote qe Bangladeshasit jane me te mire se Shqiptaret dhe i ben thirtje biznesit ti heqi punetoret shqiptare dhe ti zevendesoj me bangladeshas.
      Keto palo njerezish e meritojne kete qeveri qe kane.

  3. Ky vend eshte bere komplet bordellhane . Por nese ne bordellhane shkohet per te bere qejf , nga ketu duhet te ikesh me te katra nga çmenduria e gjithçkaje . Vend i rremujshem , vend i frikshem .

  4. e tmershme e kishin shkaterruar murin tre mij vjecar tek porto romane ne durres afer hidrovorit… po as dhe dhjet porte nuk bejn sa ato mure te lasht,,,

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *