Duhej fitorja, por nuk e mori askush. Partizani e Vllaznia barazojnë 1-1 në Air Albania, në një ndeshje të tensionuar e me polemika, për penalltinë që hapi ndeshje në favor të shkodranëve e kartonin e kuq për Hakajn, të akorduar me VAR, që e la skuadrën e Brdaric me 10 lojtarë, duke i dhënë mundësinë të kuqve të barazonin me Carën në pjesën e dytë.
Mehmeti nuk mundi të shihte mirë nëse idea e tij për të përballuar Vllazninë ishte ajo e duhura, sepse Bitri preku një top brenda zonës që në minutën e 8, për të cilin Lata akordoi penalltinë, nën protestat e Partizanit. Protesta që do të bëheshin edhe më të forta, pasi goditjen e parë të Latifit, portieri Hoxha e bllokoi, por VAR vlerësoi se kapiteni i të kuqve kishte dalë përpara portës dhe e përsëriti 11 metërshin, duke i dhënë një shans të dytë Latifit, që këtë herë nuk e humbi. Reagimi i Partizanit erdhi me Markun e Skukën, që frikësuan Zogovic. Megjithatë në fundin e pjesës së parë gjërat u ndërlikuan për Brdaric, sepse Hakaj u ndëshkua me karton të kuq, për një goditje në fytyrë ndaj Markut. Arbitri e mori vendimin vetëm pas konsultimit me VAR.
Me 10 lojtarë ishte e kuptueshme që Vllaznia luajti në pritje pjesën e dytë, duke lënë vetëm hapësirë për kundërsulmin. Tentativat e të kuqve u shtuan, duke vënë në provë mbrojtjen e shkodranëve. Skuka në të 53, e Bitri në të 57 nuk mposhtën Zogovic, por portieri u detyrua të dorëzohet në të 65, kur Cara barazoi rezultatin. Presioni i skuadrës së Mehmetit ishte i madh, por në shtesë traversa shpëtoi Vllazninë në goditjen e Carës. Vllaznia ngec në vrapin e saj drejt titullit dhe tani rrezikon ta shohë Tiranën ti shkojë edhe më larg, ndërsa edhe Partizani, për Europën duhet të shpresojë vetëm te Kupa.