Dje, Paris Saint-Germain ngeci në humbjen e dytë të sezonit në Ligue 1, avantazhi ndaj Marsejës, e dyta, mbetet më se qetësues, por Leonardo dështimin me Nantes nuk e ka kapërcyer dot: “Të gjitha faktet arbitrale që ndodhën gjatë ndeshjes ishin kundër nesh, flas për gjëra të qarta. Kërkojmë pak respekt, sepse na vjen turp nga ky lloj arbitrimi”.
Drejtori parizien shton dozën e akuzave: “Ne kemi gabimet tona, do të mësojmë nga kjo dhe e pranojmë humbjen, por ndjesia, ndoshta e kam gabim, është se arbitri mendonte: është Neymar, nuk fishkëllej! Është Mbappe, nuk fishkëllej! Është Messi, nuk fishkëllej! Është PSG, nuk fishkëllej!”. Braziliani insiston: “Appiah duhej të përjashtohej në rastin e penalltisë, e meritonte kartonin e dytë të verdhë, me arbitrin u duk: pum, pum, pum, të qëlloj!”.