Nga Marta Shokalo, gazetare e BBC në Kiev
U zgjova nga gjumi kur mora një mesazh nga një koleg për fjalimin e Vladimir Putin që shpallte pushtimin e Ukrainës.
Më pas filluan menjëherë shpërthimet. Unë mund t’i dëgjoja nga shtëpia ime dhe njerëzit nga pjesë të ndryshme të qytetit filluan të dërgonin mesazhe në grupin tonë ËhatsApp, për shpërthime që ndodhnin pranë tyre.
Të kuptoje se edhe Kievi ishte nën sulm dhe jo vetëm vija e frontit në lindje të vendit, ishte një tronditje e madhe.
Nuk ka më vend të sigurt në Ukrainë.
Frika më e madhe për njerëzit e zakonshëm këtu është mbarimi i energjisë elektrike dhe interneti që nuk funksionon. Atëherë do të ishim vërtet të izoluar. Një frikë tjetër është se urat mbi lumin Dnieper do të bombardohen duke ndarë gjysmën lindore dhe perëndimore të qytetit.
Shpërthimet vazhduan për rreth 30 minuta.
Vesha djalin tim 10-vjeçar. Hëngrëm pak mëngjes, duke u ulur sa më larg dritareve, por ai ishte aq i frikësuar sa volli. Morëm një qiri dhe pak ujë në bodrum, i cili do të jetë streha jonë nëse gjërat përkeqësohen.
Ka radhë të mëdha jashtë supermarketeve pranë shtëpisë sime dhe në ATM, shumë prej të cilave kanë mbetur pa para. Edhe disa pika karburanti tani janë boshatisur dhe mbyllur. Ka një ajër paniku, tani që e dimë se i gjithë vendi është nën sulm.
Rrugët jashtë qytetit janë të bllokuara nga trafiku, por është një udhëtim i rrezikshëm – duke u bllokuar në radhë të gjata trafiku që lëvizin ngadalë, mund të mbetesh pa karburant larg shtëpisë. Trenat po funksionojnë, por ka turma të mëdha njerëzish që përpiqen të zënë një vend. Hapësira ajrore e Ukrainës është e mbyllur, sipas ligjit ushtarak të prezantuar nga presidenti Zelensky.
Nuk janë vetëm objektivat ushtarakë që janë shkatërruar. Ne kemi parë fotografi të ndërtesave të banimit në një numër qytetesh anembanë vendit që kanë marrë goditje direkte.
Bombardimet ruse kanë prekur të gjitha rajonet e vendit. Edhe në Lviv, afër kufirit polak, sirenat ranë mëngjesin e sotëm dhe një koleg duhej të strehohej në një strehë për shkak të bombave.
Një tjetër koleg ka tërhequr familjen e tij nga Kievi me shpresën për të shmangur sulmet nga ajri.
Fshatrat mund të jenë më të sigurt se qyteti, por në një vend të sulmuar nga veriu, lindja dhe jugu, këtu nuk ka më një vend vërtet të sigurt. ©Marrë nga BBC, përshtati në shqip lapsi.al