“Kishim menduar se ishte ndeshje e vështirë, kundërshtarët janë me cilësi edhe pse nuk ka pikët afër. Kur është një ndeshje mes rivalësh janë të dy rezultatet. Nuk është e rëndësishme rezultati në disa raste por si reago. Ekipi reagoi pas minutave të parë, pas penalltisë ndryshuam modul dhe ishim gjithmonë në ekuilibër”. Orges Shehi është i entuziazmuar nga fitorja 1-2 me përmbysje në Loro Borici kundër Vllaznisë. Tekniku i Tiranës përcakton penalltinë e humbur nga Latifi si pikën vendimtare të Klasikes. “Penalltia do na vështirësonte ndeshjen. Bekajt nuk ia kam dhënë unë indikacionet, penalltia është meritë e portierit, si vendosen, si qëndron dhe sa e vë kundërshtarin në trysni. Merita i takon Visarit”.
Natyrisht nuk është vetëm punë individi dhe Shehi e ka të qartë. Merita për një rezultat kaq të rëndësishëm në transfertë është e një skuadre që vazhdon të kalojë me sukses edhe mungesat e vazhdueshme: “Sigurisht që janë cilësitë e ekipit si u interpretuan skemat, merita i shkon lojtarëve. Kur lojtarët e ndjekin dhe interpretojnë mirë, është gjë plus, na vjen mirë që skemat na dalin, merita është e lojtarëve dhe më vjen mirë që gjithçka shkoi sipas parashikimit – tha Shehi që tregon edhe leximin e ndeshjes dhe lëvizjen taktike të bardhebluve që i coi drejt suksesit -. Kur i merr mesfushën i ke marrë zemrën e manovrës. Kur pamë që luante me Dianje në qendër, e bëmë më të lehtë se ishim superiorë, por kishim kujdes, se me lojtarët që ka para Vllaznia janë të rrezikshëm”, tha Shehi.