Një garë pa rivalë, ndaj dhe rezultati nuk është se ishte surprizë. Agim Ademi është rizgjedhur president i FFK-së, edhe për katër vitet e ardhshme, në përfundim të Asamblesë Zgjedhore të Përgjithshme të zhvilluar nga Federata e Futbollit e Kosovës. Të pranishëm në Asamblenë e Përgjithshme Zgjedhore ishin prezentë 43 delegatë ku të gjithë kanë votuar pro shpalljes sërish president të Agim Ademit, i cili fitoi mandatin e tij të dytë në krye të FFK-së.
Mandati është 4-vjeçar dhe do të skadojë në vitin 2026, por rikonfirmimi i Ademit nuk ishte surprizë. Të gjithë kandidatët përfshirë këtu Gramoz Vokrrin dhe Remzi Ejopin janë nxjerrë nga gara përpara se të futeshin në votim. Në fakt, Federata e Futbollit e Kosovës, ka njoftuar se ka rrëzuar kandidaturën për president të djalit të Fadil Vokrrit, edhe pse ai kishte dorëzuar 16 propozime javën e kaluar në zyrën e federatës.
Komisioni i FFK-së për verifikimin e kandidaturave dhe nënshkrimeve të kandidatëve për president, ka vendosur të mos ia pranojë të gjitha 16 nënshkrimet Vokrrit, duke gjetur disa shkelje. Një kandidati i nevojiten 15 nënshkrime të delegatëve të FFK-së për të pasur të drejtë të garojë për president të shtëpisë së futbollit. Komisioni i FFK-së thotë se ka gjetur parregullsi në nënshkrimet që Vokrri i kishte siguruar nga FC Prishtina, ish-klubi i kandidatit tjetër Ejupi, FC Ulpiana dhe FC Kika.
Vetëm dy ditë më parë, Federata e Futbollit të Kosovës njoftoi se Gjykata në Prishtinë ka njohur ligjshmërinë e zgjedhjeve për president që ishin caktuar të mbahen sot. Në një njoftim të FFK-së, bëhet me dije se ky është një process legjitim, nga të cilët do dalin anëtarët e rinj të Komitetit Ekzekutiv dhe presidenti i ri. Agim Ademi, kreu aktual është një nga kandidatët, teksa kërkesa e Gramoz Vokrrit për të hyrë në process nuk u morr parasysh.
Procesi zgjedhor për president të FFK-së është njollosur tashmë për shkak të dyshimeve serioze se federata e ka shkelur Statutin e vet duke i thirrur ato në afat të shkurtër kohor dhe rreth tre muaj pa i përfunduar mandati i tanishëm.