Juve triumdon në Cagliari me përmbysje. Në javën e 32 të Serie A, skuadra e Allegrit mundi 1-2 të besuarit e Mazzarrit dhe mbrojti vendin e katërt, duke arritur në 62 pikë. Në Unipol Domus ishte Joao Pedro (10′) që zhbllokoi ndeshjen me një të djathtë të saktë, ndërsa më pas Chiffi anuloi një gol të Rabiot për një prekje me dorë, përpara se De Ligt (46′) të barazonte rezultatin me kokë. Në pjesën e dytë, bardhezinjtë shtynë përpara, shtuan presionin dhe Vlahovic (75′) përmbysi rezultatin, duke realizuar një vertikalizim të Dybalës.
Pas humbjes me Interin, Juventus ngrihet në këmbë dhe rifillon garën për një vend në Champions League. Një garë disi e komplikuar nga një fillim befasues në Cagliari, por gjithsesi e sjellë në shtëpi me një provë karakteri në fund të një ndeshje delikate, duke e mbajtur Romën në një distancë të sigurt. Pas golit të shpejtë të Joao Pedros, nuk ishte e lehtë për grupin e Allegrit të përmbyste rezultatin ndaj një kundërshtari të mbyllur e me pak hapësira për t’u shfrytëzuar.
De Ligt dhe Vlahovic u kujdesën për të hedhur në erë fortesën kuqeblu, por meritat duhet të ndahen me Cuadradon dhe Dybalan, autorë të asisteve. Me mbrojtjen sarde të vendosur mirë, në fakt, cilësia dhe paparashikueshmëria e kolumbianit dhe argjentinasit nevojiteshin për të goditur objektivin. Sa i përket Cagliarit, humbja ndaj Juventusit peshon shumë. Pak sepse gara kishte nisur në mënyrën më të mirë, pak sepse renditja është gjithnjë e më e frikshme. E me frikë në këmbë dhe kokë, shpesh është e vështirë të fitosh pikë.