Ish-kampioni i boksit në peshat e rënda, Mike Tyson duket se i është bashkuar radhëve të pasagjerëve të padisiplinuar të linjave ajrore.
“Fatkeqësisht, zoti Tyson pati një incident në një fluturim me një pasagjer agresiv, i cili filloi ta ngacmonte dhe i hodhi një shishe me ujë teksa ishte në vendin e tij”, tha në një deklaratë Joann Mignano, përfaqësuese e Tyson.
Videoja e marrë nga TMZ Sports është marrë në një avion JetBlue në San Francisko, sipas TMZ. Ajo tregon një burrë që godet vazhdimisht atë që duket të jetë një pasagjer tjetër në sediljen pas tij.
Videoja e publikuar nga TMZ nuk tregon tërësinë e ngjarjes. Një shishe uji nuk duket në pamjet e postuara.
Videoja e goditjeve zgjat rreth 10 sekonda dhe përmban audion e një personi që duket se po përpiqet të qetësojë situatën, duke thirrur “hej Majk, Majk”.
Të mërkurën në mbrëmje rreth orës 22:00. PT, oficerët e policisë “u dërguan në një përleshje fizike në bordin e një aeroplani të vendosur në Terminalin e Brendshëm të Aeroportit Ndërkombëtar të San Franciskos”, sipas Departamentit të Policisë së San Franciskos (SFPD).
Dy persona që dyshohet të jenë të përfshirë në incident janë arrestuar, tha policia. Një person u trajtua për lëndime jo të rrezikshme për jetën, sipas një deklarate nga SFPD.
©LAPSI.AL