Juve-Inter përsëri, e është ende një emocion i gjatë për tu përjetuar në natën e takimit të dytë më të rëndësishëm të sezonit. Pas suksesit të zikaltërve në Superkupën e Italisë, sonte – ora 21:00 – dy të mëdhatë historike të futbollit italian do të takohen në Olimpico të Romës për aktin e fundit të Kupës së Italisë. Një përballje e rëndësishme, që bashkon Juventusin dhe Interin në vrapimin drejt një trofeu prestigjioz dhe i ndan jashtë mase në bilancin e një sezoni kompleks dhe të gjatë. Nga njëra anë Allegri, i cili rrezikon ta mbyllë vitin pa tituj dhe e ka cilësuar humbjen eventuale si “katastrofë”. Nga ana tjetër, Simone Inzaghi, në fije të perit mes ëndrrës për një treshe fantastike (Superkupë, Kupa e Italisë dhe titull) dhe makthit për të mos goditur objektivat më të mëdhenj në finish.
Kupa e Italisë, në këtë kuptim, bëhet një trampolinë ose një kërcim në boshllëk, hapi i parë drejt rindërtimit të Juventusit apo konfirmimit të epërsisë së zikaltërve, por edhe pengesa vendimtare drejt synimeve të tyre sezonale. Juve-Inter nuk do të jetë kurrë një ndeshje normale, aq më pak një ndeshje e parëndësishme. Ajo sjell historinë e një rivaliteti të pafund, të një përballjeje që në çdo rast rendit fitues dhe humbës, pa mundësi të tjera.
Në natën e Olimpicos, Allegri dhe Inzaghi do të zbresin me formacionin më të mirë. Dybala nga njëra anë, i katapultuar në finalen e fundit me Juventusin, Lautaro nga ana tjetër, Toro i zemëruar dhe vdekjeprurës që po e mban Interin në këmbë në finalen e këtij sezoni. Përveç Locatellit, sidoqoftë i rikuperuar dhe i gatshëm për të hyrë nga pankina, trajneri i Juventusit do të rreshtojë më të mirët, me Perin, portierin e Kupës, mes shtyllave dhe Chiellinin e De Ligt në mbrojtje. Ndryshimi i vetëm do të jetë prania e Bernardeschit dhe jo Moratas, pas shpinës së Vlahovic, serbit të trishtuar që nuk arrin më të shënojë.
Inzaghi nga ana e tij nuk kursen asnjë prej titullarëve të tij, i kërkon Bastonit të shtrëngojë dhëmbët dhe do të mbajë deri në momentin e fundit vetëm dyshimin që lidhet me shpatullën e Lautaros. Duhet të luajë Edin Dzeko, sepse përvoja në ndeshje si këto ka shumë rëndësi, por me lojën në vazhdim hapësirë do të ketë edhe për Correan dhe Sanchez, ekzekutuesi i Juves në Superkupë. Për pjesën tjetër, asnjë surprizë dhe mendja për një natë vetëm në Kupën e Italisë, pa kursyer asgjë për sprintin e titullit me Milanin.
Ndërkohë, Juve dhe Inter do të gjenden përballë njëri-tjetrit për herë të katërt këtë sezon: bilanci i deritanishëm thotë dy fitore për zikaltrit dhe një barazim (1-1 në ndeshjen e parë të kampionatit në San Siro). Fusha në fakt ka shprehur dhe protagonistët e përsëritën në konferencat për shtyp, se çdo përballje ishte e ashpër, e ekuilibruar, e luftuar. Me pak fjalë, spektakli nuk do të mungojë as këtë mbrëmje.