Tetorin e kaluar disa hajdutë i vodhën makinën Luciano Spallettit, në parkingun e hotelit që trajneri përdor si shtëpi në Napoli, e tani autorët e dyshuar të vjedhjes kthehen protagonistë me një mesazh befasues të postuar në sheshin para Stadiumit Maradona: “16-10-21: Spalletti, do të ta kthejmë Pandën… Mjafton që të ikësh!”. Në thelb të këtij mesazhi, është se një pjesë e mbështetësve napoletanë e fton trajnerin të largohet nga skuadra, pavarësisht një sezoni që gjithsesi çoi në kualifikimin në Ligën e Kampionëve, ashtu si kërkonte shoqëria.
Pankarta e shpalosur para stadiumit ndërhyn në një moment tensioni mes mbështetësve napoletanë, vetëm të kujtohet parrulla tjetër e shfaqur të hënën (35 vjetori i kampionatit të parë të Napolit): “10 maj 1987: 35 vjet më parë, burra të tjerë, të tjera vlera. Në m**in aktual ruajmë vetëm ngjyrat”. Vendi i tretë nuk mjafton, kështu që shansi i humbur për të fituar kampionatin në fund të sezonit është ende një plagë e hapur në qytet.
E ardhmja e Spallettit mbetet për t’u deshifruar, në këtë pikë. De Laurentiis, pavarësisht ngacmimeve të ndryshme, e sheh në qendër të projektit edhe për sezonin e ardhshëm dhe vetë trajneri është treguar i gatshëm për të qëndruar. Tani duhet kuptuar nëse kjo parrullë do të çojë në reflektime të reja, nga të dyja anët.