Kundër Lazios do të jetë ndeshja e fundit në Stadium para tifozëve të Juventusit për Giorgio Chiellinin. Tashmë pas finales së Kupës së Italisë, kapiteni i Juventusit i shpalli lamtumirën Zonjës së Vjetër, por pak para se të dilte në fushë për herë të fundit në stadiumin e tij, ai ka dashur të publikojë një mesazh të gjatë për të përshëndetur Juventusin dhe tifozët.
LETRA E CHIELLINIT
“Erdhi dita. Sonte do të më përshkojë një vorbull emocionesh.
Juve për mua ishte gjithçka. Rinia, përvoja, pjekuria ime. Dëshira për të fituar, gëzimi i triumfit, pranimi i humbjes. Ethet e sfidës, dueli në fushë, koka ime gjithmonë e fashuar. E pastaj kampionët, brenda dhe jashtë lëndinës së gjelbër, trajnerët, drejtuesit, i gjithë stafi… Njerëz që kanë kaluar duke më lënë gjithmonë diçka. Diçka që jam kujdesur ta mbledh, ta ruaj dhe ta mbroj.
Tre. Numri im. Por edhe ndjesitë që tani bashkëjetojnë në shpirtin tim.
GËZIM, për një aventurë që përfundoi kështu, për faktin se realizova çdo ëndërr, të imagjinueshme ose jo, dhe se mbeta përgjithmonë në historinë e këtij klubi të madh.
LUMTURIA, të zgjedh momentin e duhur për të thënë lamtumirë, të largohem sërish në një nivel që i përshtatet asaj që kam qenë, të kem ndarë kaq shumë vlera dhe emocione që askush nuk do të mund t’i anulojë kurrë.
MIRËNJOHJE, për të gjithë Juventusin, për familjen Agnelli që më ka adoptuar gjatë gjithë këtyre viteve, për njerëzit e mi më të dashur dhe për të gjithë njerëzit që dua, pa të cilët nuk do të isha personi që jam tani, sepse ata janë burim i pashtershëm mbështetjeje dhe energjie dhe më kanë shoqëruar gjithmonë në këtë rrugëtim të gjatë.
Kështu e gjej veten përballë perëndimit më të bukur të diellit, duke u përpjekur të imagjinoj një agim të ri. Sepse udhëtimi nuk mbaron. Ende nuk e di se çfarë më pret më pas. Por do të jetë një kohë tjetër dhe një histori tjetër. Ky, ndërkohë, është momenti për përshëndetje dhe mirënjohje të pafund dhe të thellë.
Faleminderit.
Faleminderit të gjithëve, tifozëve dhe kundërshtarëve.
Faleminderit që më mirëpritët, më duruat, më mbështetët.
Faleminderit që i dhatë kuptim domethënies së fjalës ëndërr.
Faleminderit, deri në fund, faleminderit”.