Inspektoriati Kombëtar i Mbrojtjes së Territorit në Lezhë, ka goditur katër raste të krimit mjedisor. Ky aksion vjen me qëllim parandalimin e prerjeve të paligjshme të drurëve në pyje.
Operacioni u zhvillua në zonat pranë Rrugës së Kombit dhe në aksin Rrëshen Milot nga struktura përgjegjëse e inspektimit, pranë Drejtorisë Rajonale të IKMT-së , Lezhë, si dhe Drejtoria e Inspektimit në Pyje, pranë IKMT.
Inspektimi u zhvillua gjatë natës së djeshme dhe paradites së kësaj të premteje.
Nga ky operacion u kapën në kushtet e flagrancës 4 subjekte duke transportuar me automjete lëndë drusore pa dokumentacion. Konkretisht u ndaluan shtetasit L.P banues në Pukë , M.G banues në Kurbin , P.R banues në Mirditë dhe P.M banues në Kurbin .
Ndaj këtyre personave u morën masa administrative, ata u gjobitën me 500 mijë lek të reja secili, ndërkohë që materiali drusor u sekuestrua.
Aksioni u drejtua nga drejtori i Inspektoriatit të Mbrojtjes së Territorit në Lezhë, Flori Gjini, ndërsa bëhet me dije se operacione të tillë do të zhvillohen edhe në ditët në vijim.
IKMT kërkon bashkëpunimin e qytetarëve që të bashkëpunojnë dhe të informojnë për çdo konstatim të prerjeve dhe transportit të lëndëve drusore.