Presidenti ukrainas Volodymyr Zelensky ka vizituar qytetin port të Detit të Zi, Mykolaiv për herë të parë këtë të shtunë që nga pushtimi rus. Vizita e tij vjen pasi bombardimet ruse vranë dy njerëz dhe plagosën 20 të tjerë në qytet, ndërsa Mykolaiv ka qenë synim i përhershëm i bombardimeve ruse që nga fillimi i pushtimit.
Zelensky i shoqëruar nga guvernatori i zonës Vitaliy Kim ka vëzhguar ndërtesat e larta të shkatërruara. Më tej presidenti mori pjesë në një takim me zyrtarët lokalë, në atë që dukej si një dhomë nëntokësore, ndërsa bisedimet sipas zyrës së shtypit u përqendruan në riparimin e furnizimit me ujë dhe bujqësisë.
Presidenti gjithashtu ka udhëtuar më tutje në jug në qytetin port të Odesës. Ai ka bërë një vizitë në bazën e Trupave të Mbrojtjes Kombëtare, ku përshëndeti ushtarët në vijën e parë të frontit dhe shpërndau edhe disa medalje për trimëritë e treguara gjatë luftës. Ndërkohë bombardimet ukrainase kanë bllokuar 77 minatorë në një minierë qymyri në rajonin Donetsk të Ukrainës lindore, pasi minierës iu ndërpre energjia elektrike, raporton Reuters.