Dje ruse, sot gjeorgjiane. Tenistja Natela Dzalamidze ka vendosur të ndryshojë kombësinë për të shmangur ndalimin e vendosur nga Wimbledon. Organizatorët e turneut në Londër njoftuan në prill se nuk do të pranonin lojtarë rusë dhe bjellorusë, si kundërpërgjigje ndaj pushtimit të Ukrainës nga qeveria e Moskës.
Lajmi është bërë i ditur nga e përditshmja The Times dhe numri 44 i renditjes së ATP-së, specialiste në dyshe, duhet të marrë pjesë në turne së bashku me tenisten serbe Aleksandra Kruniç. Një zëdhënës i All England Club, megjithatë, ka folur për The Times, duke thënë se ka ende një mundësi veprimi nga organizatorët e turneut në rastet e ndryshimeve të kombësisë si ai i Dzalamidze: “Kombësia e lojtarëve, e përcaktuar si flamuri nën të cilin ata luajnë në garat profesionale, është një proces i rënë dakord që drejtohet nga turnetë dhe ITF (International Tenis Federation), tha zëdhënësi.
Ndalimi i vendosur nga Wimbledon ka shkaktuar polemika të shumta, aq sa ATP dhe WTA kanë vendosur t’i heqin pikët e renditjes turneut. Në fakt, asnjë turne Grand Slam nuk ka ndjekur shembullin e Wimbledon, dhe US Open njoftoi së fundmi se lojtarët rusë dhe bjellorusë do të mund të marrin pjesë nën një flamur neutral. Vendimi i Wimbledon përjashtoi shumë lojtarë kryesorë meshkuj dhe femra, një mbi të gjithë Daniil Medvedev, numrin një aktual në botë, por edhe Andrey Rublev dhe Victoria Azarenka.