Kosto për organizimin e Lojërave Olimpike dhe Paraolimpike të Tokios, të mbajtura në 2021 pas një viti shtyrje, është përcaktuar në 1,423 miliardë jen, ekuivalente me diçka më pak se 10 miliardë euro. Kjo u konstatua nga Komiteti Olimpik në përfundim të një verifikimi të komunikuar gjatë mbledhjes së fundit të Ekzekutivit, shpërbërja e të cilit pritet në fund të muajit. Parashikimi fillestar i kostos për Lojërat ishte 1,644 miliardë jen dhe ulja me 220 miliardë jen (1.5 miliardë euro) nga shuma e vlerësuar në dhjetor është për shkak të një lehtësimi të barrës nga qeveria metropolitane.
Vëmendja tani është përqendruar në përdorimin e impianteve të ndërtuara posaçërisht për këtë ngjarje, dhe promovimin e eventeve të reja sportive në kryeqytetin japonez, për të ‘justifikuar’ përpjekjen e madhe financiare që – emergjenca shëndetësore e shkaktuar nga pandemia Covid, e bëri atë edhe më të kotë. Konkretisht, sipas statistikave përfundimtare, në Lojërat Olimpike Verore morën pjesë një rekord prej 11,420 sportistësh, ndërsa në Paraolimpiadë, një rekord i ri prej 4,403 para-atletësh. Mungesa e spektatorëve, apo ardhja e turistëve të huaj, për shkak të ndalimit të vendosur nga masat anti-Covid, i privoi organizatorët nga të ardhura prej 90 miliardë jenësh (630 milionë euro) për shkak të mosshitjes së biletave. Projekti fillestar i listuar nga komiteti i Tokios në vitin 2013, kur ishte ende vetëm një qytet kandidat, kishte vlerë rreth 734 miliardë jen, ekuivalente me 5.1 miliardë euro.