Avokati i familjes së Brian Laundrie publikoi dje tetë faqe nga fletorja e Laundrie që u gjet pranë eshtrave të tij në Florida në tetorin e vitit të kaluar, sipas një njoftimi për shtyp të marrë nga WINK e CNN.
Në fletore, Laundrie shkroi pjesërisht:
“Më vjen keq për të gjithë që do të ndikohen nga kjo. Gabby ishte dashuria e jetës sime, por e di që shumë e adhurojnë. Më vjen shumë keq për familjen e saj, sepse i dua.”
Në një faqe tjetër, ai shkroi se Petito ishte plagosur dhe ai po përpiqej ta ndihmonte.
“Nuk i di përmasat e plagëve të Gabby-t, di vetëm se ajo kishte dhimbje të jashtëzakonshme. I dhashë fund jetës së saj, mendova se ishte diçka e mëshirshme, se ishte ajo që ajo donte, por tani i shoh të gjitha gabimet që kam bërë. Më kapi paniku. Isha në shok. Por që në momentin që vendosa, ia largova dhimbjen, e dija që nuk mund të vazhdoja pa të”, ka shkruar ai.
Shkaku i vdekjes së Petitos u gjykua të ishte mbytja.
Avokati i familjes Laundrie, Steven Bertolino tha se ai i publikoi faqet e fletores pas një takimi me FBI-në dhe me një avokat të familjes së Petitos, ku ata mblodhën sendet personale të Petito dhe Laundrie.
Bertolino publikoi tetë faqe të fletores dhe nuk dihet renditja e tyre në fletoren që u gjet. Në faqen e fundit të publikuar, Laundrie shkroi:
“Unë e kam vrarë veten pranë këtij përroi me shpresën se kafshët mund të më copëtojnë. Që kjo të mund të bëjë të lumtur disa nga familjarët e saj.”
Fjalët e fundit në faqe, të shkruara me një stilolaps të ndryshëm nga ato të mëparshme, thoshin:
“Ju lutemi merrini të gjitha gjërat e mia. Gabby i urrente njerëzit që linin mbeturina.”