Në Angli është ngritur një stuhi rreth Chelsea. Një hetim i New York Times për klimën toksike që mbretëron brenda klubit londinez, konkretisht në fushën e marketingut, po trondit ambientin e Blues, pak javë pas dorëzimit historik të pronësisë nga Roman Abramovich te Todd Boehly. Rreth një duzinë punonjës denoncuan episode të ngacmimit në punë (mobing), bullizëm dhe intimidim të llojeve të ndryshme, të cilat i shtohen vetëvrasjes tronditëse të Richard Bignell, ish-drejtues i Chelsea TV.
Është e paqartë nëse gjesti i Bignell, që daton në janar, i atribuohet drejtpërdrejt presionit në punë. Ajo që është e sigurt është se burri u pushua nga puna në shtator 2021, pasi kishte kaluar një periudhë në zonën e marketingut dhe një mungese për shkak të sëmundjes, e se incidenti ndihmoi në hapjen e kutisë së Pandorës në lidhje me mjedisin e punës të atij sektori specifik të klubit, të drejtuar nga Gary Twelvetree.
Menaxhimi i Twelvetree, sipas dëshmive të mbledhura nga New York Times, ka shkaktuar probleme për shumë nga 50 punonjësit e departamentit: disa ishin ndjerë të përçmuar, të intimiduar, të poshtëruar dhe madje të frikësuar edhe vetëm duke marrë pjesë në një takim. Disa prej tyre kanë zhvilluar ankth dhe shqetësime të gjumit. Disa më pas lanë vendet e tyre për të kërkuar punë diku tjetër.
Në mars, pra, para ndryshimit të pronësisë, klubi kishte nisur një hetim për situatën, të koordinuar nga një kompani e jashtme, por, paradoksalisht, të mbështetur nga vetë Twelvetree. Punonjësit treguan se rezultati i këtij hetimi nuk u bë i ditur dhe se praktikat e punës nuk kanë pësuar asnjë lloj ndryshimi.
Përpara publikimit të hetimit, shoqëria i tha të përditshmes njujorkeze se kishte krijuar “një ekip të jashtëm shqyrtimi për të hetuar akuzat që ishin bërë nën pronësinë e mëparshme”, duke shtuar se “bordi i ri i klubit beson fuqishëm në një punë mjedisi dhe një kulturë korporate që fuqizon punonjësit e tij dhe përpiqet që ata të ndihen të sigurt, të përfshirë, të vlerësuar dhe të besueshëm. Pronarët e rinj kanë ndërmarrë hapat e parë për të krijuar një mjedis në përputhje me vlerat tona.”