E ardhmja e Matthijs de Ligt nuk është ende plotësisht e përcaktuar, por duket se gjithnjë e më shumë flet gjermanisht. Pasi ka gjetur marrëveshjen me Barcelonën për shitjen e Lewandowskit, Bayern Mynih është gati të rikthehet në sulm për holandezin, me një ofertë të re në rritje për Juventusin dhe në shtëpinë bavareze ka shumë besim në suksesin e operacionit: “Ne kemi pasur dhe do të kemi bisedime, ai dëshiron të vijë këtu”, tha drejtori ekzekutiv i klubit gjerman, Oliver Khan, i intervistuar nga Bayerischer Rundfunk.
Një optimizëm që shkon paralelisht me atë që ka treguar për Bild, drejtori sportiv i bavarezëve, ish-lojtari i Juventusit, Hasan Salihamidzic, i cili pas takimit me Arrivabene, Cherubinin dhe Nedved deklaroi: “Ne do të bëjmë më të mirën për Bayern Mynih. Mendoj se jemi në një pozicion të mirë për De Ligt për momentin, sepse ne kemi bërë tashmë disa gjëra. Kjo i bën gjërat më të lehta në merkaton e transferimeve”.
Megjithatë, problemi deri më tani kanë qenë shifrat: Juventus kërkon nga 90 deri në 100 milionë euro, ndërsa bavarezët aktualisht janë të mbërthyer në ofertën e parë prej 60 plus bonuse. Distanca është e madhe dhe ndoshta marrëveshja mund të jetë në gjysmë të rrugës, me Bayern që do të arkëtojë tani para nga shitja e Lewandowskit dhe është gati të ngrejë ofertën, por edhe të kërkojë një ‘zbritje’ të fortë për faktin se mbrojtësi shkon në skadencë në vitin 2024 dhe nuk ka asnjë qëllim, për momentin, për të rinovuar.