Pesë mjete lundruese “Jet ski” janë bllokuar gjatë korrikut, ndërsa janë ndëshkuar me gjobë 25 drejtues, të cilët kanë kryer manovra të rrezikshme, duke rrezikuar jetën e pushuesve. Nga policia, që ka zhvilluar kontrolle me qëllim sigurinë e pushuesve në bregdetin e jugut, mësohet se janë gjobitur me nga 10 mijë lekë 25 drejtues të mjeteve lundruese, të cilët duke kryer manovra të rrezikshme dhe në zonat e ndaluar kanë vënë në rrezik sigurinë e pushuesve të bregdetit.
Vendi ynë po përballet prej javësh me aksidente me mjete lundruese në bregdetin e vendit tonë. Një 40-vjeçar përplasi me gomone një 7 vjeçar në plazhin e Jonufrës në Vlorë. Incidenti ndodhi teksa 7-vjeçari po notonte në breg, ndërsa 40-vjeçari nuk ka respektuar kufizimin me bova detare dhe është futur në zonën në të cilën nuk lejohet lëvizja e mjeteve lundruese, duke lënë të plagosur fëmijën.
Ndërsa më 17 korrik, Gjergji Priftuli humbi kontrollin e gomones duke plagosur dy pushues në Jalë. 37-vjeçari po kryente manovra të rrezikshme disa qindra metra larg bregut dhe më pas u rrëzua në ujë. Në këto moment gomonia u nis me shpejtësi dhe përplasi çiftin e të rinjve në breg të detit.