Presidenti francez Emmanuel Macron do të zhvillojë ditën e sotme një bisedë telefonike me homologun e tij ukrainas Volodymyr Zelensky për situatën në termocentralin bërthamor Zaporizhia, i cili është nën kontrollin e forcave ruse.
Centrali më i madh në Europë, ra nën kontrollin e trupave ruse në fillim të marsit. Që nga fundi i korrikut, janë raportuar disa sulme artilerie në central për të cilat palët ndërluftuese fajësojnë njëra-tjetrën, duke ngritur shqetësimin se mund të shkaktohet një fatkeqësi bërthamore.
Çështja u diskutua javën e kaluar në Këshillin e Sigurimit të OKB-së.
Një “katastrofë” në termocentral do të kërcënonte të gjithë Europën, paralajmëroi Zelensky të hënën, duke akuzuar ushtrinë ruse për “bombardimin e qyteteve dhe komuniteteve të afërta” nga centrali bërthamor.