Kryeministri Albin Kurti i ka ftuar për një bisedë online ose fizikisht kryetarin e PDK-së, Memli Krasniqi, kryetarin e LDK-së, Lumir Abdixhiku dhe kryetarin e AAK-së, Ramush Haradinajn. Kreu i qeverisë së Kosovës ka njoftuar se ai do t’i presë liderët e opozitës të martën në zyrën e tij, por jo të gjithë duket se e kanë pranuar ftesën për të folur për çështjen e dialogut me Serbinë.
Kryetari i Partisë Demokratike të Kosovës, Memli Krasniqi ka njoftuar se nuk do marrë pjesë në takimin e Kurtit duke i kthyer përgjigje me një letër zyrtare.
“Aktualisht, e tëra që po shohim është se dialogu ka rrëshqitur në nivel teknik, duke përfshirë riciklimin e marrëveshjeve të kaluara. Sa i takon zbatimit të përgjegjësive që keni si udhëheqës i Dialogut, unë ju inkurajoj që të vazhdoni angazhimin tuaj dhe te qeverisë për respektim të vendimeve të ligjshme që sigurojnë reciprocitet në raport me Serbinë, si dhe sundim të ligjit dhe lëvizje të lirë në gjithë territorin e Republikës së Kosovës.
Por, nuk konsideroj se në këtë moment ka një situatë emergjente për t’u takuar e për të diskutuar për këto përgjegjësi tuajat. Megjithatë, unë mbetem i hapur dhe i gatshëm që të takohem me ju në momentin kur të ketë avancim të procesit të Dialogut dhe diskutim konkret për arritjen e marrëveshjes finale, që ka për qëllim njohjen e ndërsjellë”, – është shprehur kreu i PDK-së.
Ai thotë se qëndrimi i PDK mbetet i njëjtë dhe konsistent, në mbështetje të Dialogut, të fokusuar në arritjen e marrëveshjes finale, që sjell njohjen e ndërsjellë ndërmjet Republikës së Kosovës dhe Serbisë dhe që mundëson anëtarësimin e Kosovës në OKB, NATO dhe BE, duke ruajtur sovranitetin dhe integritetin territorial të vendit.
Ndërsa kreu i LDK-së, Lumir Abdixhiku ka thënë se edhe pse kjo ftesë është me vonesë, do të pranojë të takohet me Kurtin.
Abdixhiku më tej është shprehur se ka pritur që procesi i dialogut të jetë më transparent dhe gjithëpërfshirës, si dhe ka falënderuar liderët amerikan për angazhimin në dialog.
“Publiku kosovar ndërsa, mbetet ende i painformuar mbi këtë proces; siç mbetet i painformuar edhe Kuvendi i Republikës së Kosovës. Dy javë pas takimit në Bruksel, kryeministri ka zgjedhur të informoj spektrin politik në vend. Këtë qasje të mbyllur e kemi kritikuar gjithherë edhe kur ky kryeministër ndante opozitën me ne”, – u shpreh Abdixhiku.
Ai ndër të tjera ka theksuar se qëndrimi i LDK-së për dialogun është i pandryshueshëm, si dhe besojnë se ky dialog është interes kombëtar i Kosovës.
Ftesën e ka pranuar edhe kreu i AAK-së, Ramush Haradinaj.
“Gjithmonë kam konsideruar se për tema të interesit nacional, nuk ka qeveri dhe opozitë. Të gjithë e kanë pjesën dhe rolin e tyre. Megjithëse nuk mund ta lë pa e përmendur se Alenacën si parti, por edhe Opozitën në tërësi, kryeministri Kurti këtë herë i kishte përjashtuar nga çfarëdo konsultimi, apo edhe më keq, informimi, lidhur me atë se çfarë ka ndodhur në Bruksel” – shkroi Haradinaj në Facebook. ©LAPSI.al