“Të dy golat e parë, që erdhën brenda tre minutash, mund të themi që nuk ishin aty ku duhej të kishte luftë sportive edhe për të larguar aksionin, Ne aty jo toleruam, por duhej të kishim qenë më të vendosur. Pastaj kur pëson gol në atë mënyrë, çdo gjë venitet, humb besimin te vetja, skuadra e shoku”. Mirel Josa nuk gjen justifikime për të komentuar humbjen 3-0 përballë Egnatias. Skuadra e tij dështoi të bënte favoritin, duke zhgënjyer në të dy fazat e lojës e duke nervozuar teknikun: “Dy golat e parë ishin me hapësirat që lamë mbrapa, vinte topi te Musta që në mesfushë, u përplas me njërin, dilte te tjetri. Aty për çfarë jemi, për të mbrojtur apo për të fituar topin e dalë në sulm? Fundja e fundit spastrohet problemi e vazhdohet loja përsëri. Unë mendoj se sot sa i përket lojës që duhej të bënim ne në sulm apo në mbrojtje, kishim probleme shumë të mëdha”.
Pas dy fitoresh të mëdha, kundër Kukësit e Tiranës, rrogozhinasit e kthyen Vllazninë në traumën që i shkaktoi Erzeni në debutim. “Dy golat e pësuar shumë shpejt na ulën moralisht për vazhdimësinë e lojës, se e thashë që organizohej në mbrojtja skuadra e Egnatias me 5 mbrojtës dhe 2 mesfushorë dhe priste gabimin që të na godiste përsëri. Unë kështu e shoh ndeshjen dhe e shoh edhe problemin që merren 6 pikë shumë të çmueshme me Kukësin e Tiranën e humben me Egnatian”.
Tekniku evidenton edhe problemin e mendjemadhësisë, duke kujtuar të tijtë se titulli fitohet në fund: “Ne e kemi filluar shumë shpejt, jo lojtarët e klubi, të flasim për kampion por çdo skuadër e shihni që ka problemet e veta. Edhe ne nxjerrim probleme nga momenti që bëjmë dy lojë relativisht të mira, edhe me Tiranën ne rrezikuam të barazoheshim, kështu që unë them që duhet seriozitet më i madh se nuk fitohet ndeshja pa filluar”, tha Josa.