“Mendoj se nuk ka llogari duke parë kalendarin, llogari është ndeshja e radhës. Nga katër ndeshje, 3 i kemi pasur jo në fushën tonë. Duke pasur parasysh kualitetin, ne kërkojmë të përmirësohemi me top në tokë, fusha na penalizon pak”. Orges Shehi i del në mbrojtje skuadrës, pas 0-0 ndaj Kastriotit, ndeshja e dytë radhazi pa fitore për Tiranën. Tekniku tenton ta shohë gotën gjysëm plot, duke evidentuar faktin se është një skuadër e re, që ka luajturtre nga katër ndeshjet jashtë fushës dhe për më tepër këtë herë në një fushë jo cilësore: “Të mos harrojmë që jemi skuadër 50% e re. Mesfusha ishte e ndryshme nga e vitit të kaluar. Pra një skuadër e ndërtuar në ditët e fundit sigurisht ka vështirësi. Por ekipi po prodhon, por duhet të jemi më të egër te zona dhe të mendojmë këtë rast si të jetë i fundit”.
Tekniku bardheblu ka një ide të qartë se si duhet të luajnë kampionët në fuqi, me një analizë të detajuar, mbi karakteristikat që kanë lojtarët e tij: “Duke parë këtë kontingjent lojtarësh, mendoj se nuk mund të rrimë mbrapa. E para sepse lojtarët që janë ofensivë bëhen shumë nervoz nëse nuk bien në kontakt me topin dhe kërkohet të mos rrimë poshtë se kundërsulmin nuk e kemi të forte – tha Shehi, duke tentuar të mos I lërë asgjë në dorë fatit -. Fati është prezent kudo, edhe në futboll. Unë shpresoj të mos ia lëmë fatit, të bëjmë më të mirën. Por kemi vështirësi në fund se nuk e kemi një sulmues të mirëfilltë në organikë” e mbylli tekniku duke treguar kështu se Patrick nuk është ende gati të marrë përsipër vijën e parë të kryeqytetasve.