Kryetari i Partisë së Lirisë, Ilir Meta ka folur nëse do të ketë koalicion me Partinë Demokratike në zgjedhjet e ardhshme vendore. Ai ka pohuar se do të bëjë gjithçka që opozita të ketë kandidatët më të mirë për të gjitha bashkitë e vendit. Megjithatë Meta nuk dha një përgjigje të prerë për një koalicion.
“Do bëhet çdo gjë që opozita të ketë kandidatët më të mirë, për Tiranën, Shkodrën dhe gjithë bashkitë e vendit. Ky është disponimi ynë. Së dyti do gjenden formulat më të mira.
Për sa i përket bashkëpunimin me Berishën, kemi qenë që pas 25 korrikut në dispozicion të koordinimit. Jemi të gatshëm të zhvillojmë çdo aksion të përbashkët që fuqizon opozitarizmin. Kontakte kam pasur dhe do kem”, – tha Meta në një intervistë në RTSH.
Kohët e fundit është përfolur për një ftohje në marrëdhëniet mes Metës dhe Berishës. Zërat u shtuan pasi Berisha nuk mori pjesë në protestën e thirrur nga “Partia e Lirisë” tek inceneratori i Tiranës.
Meta foli edhe për reformën territoriale, por tha se nuk beson që harta do të ndryshojë.
“Unë mbështes 100% propozimin e zotit Ylli Asllani. Por mendoj se nuk do ketë një ndryshim të hartës territoriale.
Propozimi për 30 njësi vendore? Ne jemi kundër çdo lloj skenari të tillë. Edhe ndarja aktuale ka qenë dështim. Ka qenë një marrëveshje mes Ramës dhe Bashës atëherë kur ndodhi kjo gjë.
Duheshin 84 vota për këtë reformë administrative. Unë kam insistuar, mendoja se ishte e nevojshme një reformë të tillë, kam dërguar Bashkim Finon dhe Petrit Vasilin në kongresin e PD-së për këtë reformë territoriale dhe kanë kërkuar argumentet. Ata kurrë nuk i sollën” – tha Meta. ©LAPSI.al