“E bën trajneri formacionin, por nëse më përzgjedh, do të bëj maksimumin dhe uroj të marrim tre pikët”. Armando Broja është shpresa më e madhe e Shqipërisë për të bërë goditjen në Tel Aviv. Ajo kundër Izraelit është e para nga dy ndeshjet për tu fituar në Nations League, vendimtare për kualifikimin. Sulmuesi i Chelsea e di mirë se mbi të janë fokusuar të gjithë prozhektorët, por presioni nuk e prek aspak: “Nuk kam asnjë presion kur luaj futboll, pasi kam nisur futbollin që në moshën tre vjeçare. Luaj futboll për qejf dhe për të fituar ndeshjen dhe për të ndihmuar ekipin, por nuk kam asnjë presion”.
Me apo pa presion ajo kundër Izraelit është një ndeshje vetëm për tu fituar: “E dimë që do të jetë ndeshje e vështirë – tha Broja – sepse na kanë mundur në ndeshjen e parë. Por kësaj radhe na duhet fitore dhe uroj të luajmë mirë si ekip dhe të marrim fitoren”.
Lexo më tej: Video/ Cikalleshi i tërheq vëmendjen Rejës: “Më mirë është kur luajmë me dy sulmues”
Shkodrani ka luajtur fraksione ndeshje me Blues në Premier League e madje debutoi në Champions. Por megjithatë ndihet plotësisht në formë për të tërhequr kombëtaren drejt suksesit: “Gjithmonë jam në formë. Kam bërë stërvitje çdo ditë dhe e dimë që është më e vështirë të luaj te Chelsea sesa të luaja te Southampton. Por jam stërvitur çdo ditë me lojtarë shumë të mirë dhe jam fizikisht mirë”.
https://www.youtube.com/watch?v=t0ta1hvI6S4