• |
ide | kryesore

Vuçiç: Mbështesim integritetin territorial të anëtarëve të OKB-së, përfshirë Ukrainën

-Instant, Lajme, Të fundit



Presidenti serb, Aleksandër Vuçiç ka thënë më 21 shtator në Nju Jork se Serbia mbështet integritetin territorial të të gjitha vendeve anëtare të Kombeve të Bashkuara, përfshirë atë të Ukrainës. Në fjalimin e tij, Vuçiç ka thënë se Serbia “ka vepruar me përgjegjësi dhe seriozitet” në këtë aspekt.

“Ne jemi në kërkim të një përgjigjeje të qartë të pyetjes që unë ua kam bërë bashkëbiseduesve, liderëve të shumë shteteve për vite me radhë. Cili është dallimi në mes të sovranitetit dhe integritetit territorial të Ukrainës dhe sovranitetit dhe integritetit territorial të Serbisë? Kjo e fundit është përballur me shkelje të rënda. Shumë prej jush u keni dhënë njohje ndërkombëtare dhe legjitimitet. Unë nuk kam marrë kurrë një përgjigje racionale në këtë pyetje nga askush”, ka deklaruar Vuçiç.

Deklarata e tij ka qenë referencë për Kosovën, e cila ka shpallur pavarësinë më 2008. Serbia nuk e njeh shtetësinë e Kosovës dhe ia bllokon anëtarësimin në organizatat ndërkombëtare. Ky shtet mbështetet edhe nga Rusia e Kina.

Vuçiç ka thënë gjatë fjalimit të tij se Serbia “me durim dhe shumë gatishmëri do të vazhdojë të kërkojë kompromis” me Kosovën.

Kompromis me Kosovën

“Kompromisi është mënyra e vetme për të arritur paqe afatgjatë. Ne tashmë kemi shterur të gjithë mundësitë e tjera. Nuk po mendojmë të kthehemi në rrugën e luftës dhe përgjakjes”, ka thënë mes të tjerash Vuçiç.

Sipas tij, rajoni i Ballkanit nuk mund të durojë edhe një konflikt tjetër. Presidenti serb ka theksuar se Beogradi është duke zhvilluar negociata “në kushte komplekse, me elemente të një lufte hibride dhe fushatë të ndyrë nga ana e publikut ndërkombëtar”.

“Mjafton t’ju kujtoj një njoftim të mediave botërore se Serbia do të sulmojë fqinjët, dhe që përbën kërcënim për stabilitetin rajonal. Natyrisht, diçka e tillë nuk ka ndodhur kurrë, dhe ka qenë vetëm një prej serive të gënjeshtrave kundër Republikës së Serbisë”, ka thënë ai.

Sipas tij, parimi i paprekshmërisë së kufijve duhet të zbatohet për të gjitha shtetet. Pavarësia e Kosovës është njohur nga Shtetet e Bashkuara dhe shumica e shteteve të Bashkimit Evropian.  Gjykata Ndërkombëtare e Drejtësisë në Hagë, ka thënë se shpallja e pavarësisë së Kosovës më 2008, nuk përbën shkelje të ligjit ndërkombëtar.

Ai ka përmendur se disa shtete të Ballkanit Perëndimor kanë tejkaluar shumë barriera që kanë ekzistuar mes popujve për shumë vite. Si shembull, ai ka thënë se “Serbia dhe Shqipëria, sot, kanë marrëdhëniet më të afërta dhe më miqësore në histori”, dhe se bashkë me Maqedoninë e Veriut, tri vendet kanë krijuar nismën, Ballkani i Hapur. Kosova, Bosnje-Hercegovina dhe Mali i Zi, nuk janë pjesë e saj. Ballkani i Hapur është thënë se synon të mundësojë lëvizje të lirë të njerëzve, mallrave dhe shërbimeve në rajonin e Ballkanit Perëndimor. Deri më tani janë nënshkruar disa marrëveshje që mëtojnë të lehtësojnë lëvizjen në mes të shteteve.

Serbia dhe lufta në Ukrainë

Serbia nuk i ka vënë sanksione Rusisë për luftën e nisur në Ukrainë në fund të muajit shkurt. Mirëpo ky vend e ka dënuar Rusinë disa herë përmes votimeve në OKB.

Serbia është shtet që varet nga gazi rus dhe sondazhet tregojnë mbështetje të madhe të popullsisë serbe për Rusinë. Megjithatë ndihmën më të madhe ky shtet e pranon nga Perëndimi.

Presidenti rus, Vladimir Putin, ka urdhëruar pushtimin e Ukrainës më 24 shkurt.

Ai e quan luftën si “operacion special ushtarak” për të çmilitarizuar Ukrainën. Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre./REL/



2 Comments

  1. “Ne jemi në kërkim të një përgjigjeje të qartë të pyetjes që unë ua kam bërë bashkëbiseduesve, liderëve të shumë shteteve për vite me radhë – cili është dallimi në mes të sovranitetit dhe integritetit territorial të Ukrainës, dhe sovranitetit dhe integritetit territorial të Serbisë”.

    Pergjigjja me e thjeshte qe ketij diaboliku nuk ka tru t’ia jape se pari Rama, e se dyti te tjeret: Dallimi eshte se mbi rajonet ruse te Ukraines, qe sot jane pushtuar nga Rusia, nuk eshte kryer genocid nga Ukraina, nuk ka pasur perpjekje shkombetarizuese, nuk ka pasur shtypje e nuk ka pasur kolonizim. Ndersa ne krahinen shqiptare te Kosoves, te pushtuar nga Serbia me 1912, nuk ka ndalur kurre as gjenocidi, as vrasjet, as perndjekjet, as kolonizimi, as zhvatja ekonomike. Ky eshte dallimi qe e ben Kosoven te jete sot e cliruar, ndersa Donbasin, te pushtuar. Beje kaush tani kete qendrimin prej gjasme naivi. Dhe beji te fala Batonit.

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *