Policia bëri të ditur këtë të martë se ka vënë në pranga 14 persona dhe ka shpallur në kërkim 5 të tjerë, të cilët dyshohen se janë të përshirë në disa ngjarje kriminale, mes të cilave vrasje dhe shitblerje armësh. Një vrasje e kontraktuar është parandaluar më parë. Atentati do kryhej me eksploziv.
Gjithçka ka nisur pas marrjes peng të dy vëllezërve Gentjan dhe Indrit Beqiraj në autostradën Durrës-Tiranë.
Mes ngjarjeve ku këta persona janë të përfshirë, sipas policisë, është vrasja e Erion Çelës, 35 vjeç, më 4 janar të këtij viti. Përveç tij, mbetën të plagosur edhe 4 persona të tjerë. Mes të cilëve edhe vëllai i viktimës, Blerim Çela, 28 vjeç, i cili ka mbetur i plagosur në këmbë dhe në fytyrë.
Ndërkohë, sipas policisë, dy vëllezërit janë kontaktuar dhe porositur nga shtetasi F. B., që kundrejt pagesës të kryenin vrasjen e shtetasve S. Z. dhe I. H. Për këtë veprimtari kriminale, vëllezërit kanë marrë një shumë paraprake prej 3500 eurosh dhe kanë siguruar mjetet për realizimin e kësaj ngjarjeje dhe konkretisht 4 kg eksploziv, si dhe një armë zjarri automatik, të cilat janë gjetur dhe sekuestruar gjatë kontrolleve të ushtruara nga shërbimet e Policisë, gjatë datës 3 tetor 2022.
Personat e tjerë të lartpërmendur, aktualisht të arrestuar, janë të përfshirë në aktivitetin kriminali të dy vëllezërve.
Në cilësinë e provës materiale u sekuestruan: 1 kallashnikov, municion luftarak, 4 kilogramë eksploziv, fitil zjarrpërcjellës. Gjithashtu një detonator elektrik për shpërthime në distancë, 4 automjete, nga të cilat 2 blinduara, 2 motoçikleta. Lëndë narkotike kokainë. Si dhe 17 aparate celulare, 3050 euro, 2 armë gjahu shotgan, 1 thikë, sprajt neutralizues. 4 pistoleta sportive dhe 1 palë targa.
Lexo më tej: Rrëmbimi i dy vëllezërve në Durrës, policia shpall në kërkim një nga autorët