E mërkura e Champions zbret në fushë katër grupet e para, me sfida shumë të rëndësishme që mund të vendosin kualifikimin. Ose edhe daljen e shpejtë nga turneu. Shumë takime delikate, por vëmendja është gjithësesi e përqendruar në ndeshjen e madhe të Camp Nou. Barça pret Inter në një ndeshje vendimtare për kualifikimin. Në Skoci një derbi interesant mes Rangers e Liverpool. Skuadra e Klopp shpreson të vendosë nën presion Napolin për kren e grupit.
BETEJA E CAMP NOU
Vendimtare për atë që përfaqësojnë dy skuadrat, për peshën që ka për kalimin në 1/8 dhe për polemikat e ndeshjes së parë, që e kanë përcjellë tensionin edhe në 90 minutat e Camp Nou. Tifozët blaugrana nuk e kanë harruar ende dorën e pasinjalizuar të Dumfries dhe intonuan koret anti-Inter që në sfidën e kampionatit kundër Celta Vigo. Tani Xavi pret reagimin e të tijve, të udhëhequr nga Lewandowski. Barça e ka të qartë se një fitore e munguar është praktikisht eliminim.
Nëse tekniku i Barcës ka yllin e tij të skuadrës, Inzaghi në anën tjetër duhet të bëjë pa Lukakun. Belgu nuk është ende gati dyzet ditë pas dëmtimit të pësuar si pasojë e ndeshjes së Olimpico kundër Lazios, por mungon edhe Correa. Për Inzaghin janë vetëm Dzeko dhe Lautaro në dispozicion. Megjithatë, nuk është e sigurt që trajneri zikaltër zgjedh automatikisht t’i hedhë në fushë që në minutën e parë. Në orët e fundit ka marrë formë edhe ideja për të avancuar Mkhitaryan pas Lautaro, duke forcuar mesfushën me Gagliardinin. Një zgjidhje që në letër duket se mund të garantojë mbulim fizik më të madh, por që do të ulte në mënyrë të pashmangshme cilësinë e mesfushës.
Me Bayern që vulos kualifikimin me një fitore kundër Viktoria Plzen, Barça duhet ta luajë direkt me zikaltrit kalimin në 1/8 dhe një fitore me dy gola do ti bënte punë.
PËRPLASJET E TJERA
Për Grupin A, Napoli hipotekon kualifikimin në rast fitore në shtëpi kundër Ajax, duke hedhur një hap të sigurtë drejt vendit të parë, që kërcënohet nga Liverpool, tre pika prapa, por me sfidën me Rangers të vendit të fundit.
Atletico Madrid shpreson në efektin Metropolitano për të mundur surprizuesit e Bruges, me pikë të plota deri tani në Grupin B. Simeone duhet të sigurojë kualifikimin në rivalitet me Leverkusen e Porto, që luajnë mes tyre, me të tre ekipet nga 3 pikë.
Situatë delikate edhe në Grupin D ku Tottenham e Frankfurt vendosin shumë në takimin mes tyre, ndërsa Sporting kryesues pret në Lisbonë vendin e fundit, Marseille. Francezët megjithëse të fundit janë vetëm një fitore larg vendit të parë, sa për të treguar ngjeshjen e renditjes.
Champions League Group A
18:45 Napoli – Ajax
21:00 Rangers – Liverpool
Champions League Group B
18:45 Atletico Madrid – Club Brugge
21:00 Bayer Leverkusen – FC Porto
Champions League Group C
21:00 Barcelona – Inter
21:00 Viktoria Plzen – Bayern Munich
Champions League Group D
21:00 Sporting CP – Marseille
21:00 Tottenham Hotspur – Eintracht Frankfurt