Policia e Tiranës ka vënë në pranga dy persona të shpallur në kërkim. Mësohet se shtetasi Mehmet Lamko 62 vjeç dhe Elsi Balla kanë thyer masën e arrestit shtëpiak. Efektivët i kanë arrestuar në flagrancë te zona e Komunës së Parisit.
Njoftimi i policisë:
Tiranë/Vihen në pranga 2 shtetas të shpallur në kërkim.
Finalizohet operacioni policor i koduar “Location 2”.
Shërbimet e Komisariatit të Policisë Nr. 2, në vijim të punës për kapjen e personave të shpallur në kërkim dhe vënien e tyre para përgjegjësisë ligjore, bazuar dhe në informacionet e marra në rrugë policore për vendndodhjen e dy personave të shpallur në kërkim, kanë organizuar punën për kapjen e tyre dhe kanë finalizuar operacionin policor të koduar “Location 2”.
Si rezultat i këtij operacioni, në zonën e quajtur ”Komunën e Parisit”, u bë kapja e shtetasve:
– Mehmet Lamko, 62 vjeç, të cilin Gjykata e Apelit Tiranë e ka dënuar me 2 vjet burgim, pasi ka shkelur masën e sigurisë “Arrest në shtëpi”;
– Elsi Balla, 26 vjeç, banues në Tiranë, të cilin Gjykata e Apelit Tiranë e ka dënuar me 10 muaj burgim, pasi ka shkelur masën e sigurisë “Arrest në shtëpi”.
Materialet i kaluan Prokurorisë, për veprime të mëtejshme procedurale.