Katër futbollistët e Partizanit, tre të Vllaznisë dhe dy të Teutës do të vihen menjëherë nën urdhërat e teknikut të kombëtares Edoardo Reja. Kuqezinjtë nisin sot përgatitjet në kuadër të miqësores me Arabinë Saudite që do të luhet më 26 tetor 2022 “Al Nahyan Stadium” të Abu Dabit dhe do të nisë në orën 18:30 sipas orës lokale (16:30 sipas orës shqiptare).
Përfaqësuesja kuqezi do të akomodohet në kompleksin Tropikal në Durrës, ku do të zhvillojë përgatitjet për miqësoren e tetorit. Kuqezinjtë do të stërviten në qytetin bregdetar deri të hënën pasdite, kur do të udhëtojë drejt Emirateve të Bashkuara Arabe për ndeshjen. Ndeshja sidoqoftë nuk do të transmetohet askund, me kërkesë të Federatës së Arabisë Saudite. Idea e tyre është të mos zbulohet asgjë nga përgatitja e skuadrës së tyre në vigjilje të Botërorit.
Lexo më tej: Lista e Kombëtares me dy surpriza: Reja publikon 23 lojtarët për miqësoren me Arabinë Saudite
PROGRAMI STËRVITOR
Seanca e parë stërvitore do të zhvillohet të shtunën në ora 16:00 me pjesën e lojtarëve që kanë përfunduar impenjimet javore me klubet. Po të shtunën do të organizohet edhe një konferencë për median e trajnerit Edoardo Reja. Tekniku do të flasë para gazetarëve për rëndësinë dhe objektivin e kësaj miqësoreje. Grupi do të kompletohet deri paraditen e së dielës. Vetëm atëherë skuadra do të zhvillojë seancën e parë stërvitore e plotë në ora 16:00.
Të hënën përfaqësuesja kuqezi do të zhvillojë një seancë paradite. E në ora 18:00 do të nisën nga Tirana për në Abu Dabi. Të martën e 25 tetorit ekipi do të zhvillojë seancën zyrtare në “Al Nahyan Stadium”, aty ku do të zhvillohet edhe ndeshja të mërkurën.
Më 27 tetor delegacioni kuqezi do të kthehet për në Shqipëri. Pjesa më e madhe e lojtarëve të përzgjedhur vijnë nga kampionati shqiptar. Për shumicën është hera e parë që ftohen në përfaqësuesen kuqezi. 9 prej tyre janë lojtarë që vijnë nga klube të huaja dhe shumica kanë qenë pjesë e rregullt e Kombëtares.