Aurelio De Laurentiis blindon tekniku Luciano Spalletti. Trajneri e ngjiti Napolin në vendin e parë në Serie A dhe në Ligën e Kampionëve. Kështu që, sipas gjasave, do të qëndrojë në Campania për një kohë të gjatë. Siç raporton Il Mattino, ky është vullneti i presidentit të klubit, i cili mund dhe dëshiron të ushtrojë klauzolën e rinovimit të njëanshëm në kontratën e teknikut. Rinovimi do të kryhet në maj të vitit të ardhshëm, kur skadon edhe afati i klauzolës. Një vendim që është maturuar prej kohësh dhe që duhet të zbatohet vetëm në terma burokratike. Por para se ta bëjë një gjë të tillë, ADL do të ketë një takim ballë për ballë me Spalletti.
Pauza e Botërorit do të jepte shumë kohë në dispozicion. Por nuk është e sigurt që të dy do të takohen kaq shpejt. Trajneri nga Certaldo ka një kontratë deri në vitin 2024. Sipas asaj që shkruan gazeta napolitane, gatishmëria e palëve për të vazhduar së bashku është e qart. E kjo do t’i hapte rrugën një marrëveshjeje të re, e cila duket praktikisht e përfunduar. Mbetet vetëm të bihet dakord në detaje dhe me një shtrëngim duarsh.
Në fakt, Spalletti fiton 2.8 milionë euro në sezon dhe duke aktivizuar klauzolën ai do të marrë të njëjtën pagë. Por në synimet e De Laurentiis është edhe një rregullim i rëndësishëm në rritje të pagës së tij. Takimi mund të bëhet edhe në fund të sezonit Atëherë kur ndoshta Napoli do të jetë ende në vendin e parë në kampionat. E trajneri do të mund të kërkojë një rritje të konsiderueshme.