SHBA bie dakord me BE që zhvillimet e fundit në marrëdhëniet mes Kosovës dhe Serbisë, rrezikojnë përparimin e rëndësishëm që është arritur në dialogun mes këtyre dy vendeve, nën ndërmjetësimin e bllokut evropian. Kështu ka thënë të dielën ambasadori amerikan në Beograd, Christopher Hill. Ai i ka bërë këto deklarata një ditë pas vendimit të Listës Serbe – partisë më të madhe të serbëve në Kosovë – për t’u larguar nga institucionet e Kosovës.
“Tërheqja e serbëve nga institucionet e Kosovës nuk është zgjidhje për mospajtimet aktuale dhe ka potencial për të përshkallëzuar edhe më shumë tensionet. Shtetet e Bashkuara i bashkohen BE-së në thirrjen që përfaqësuesit e Kosovës dhe Serbisë të veprojnë në përputhje me përkushtimet e bëra në dialog dhe që t’iu kthehen institucioneve të Kosovës, duke përfshirë policinë, gjyqësorin dhe administratën lokale”, – ka thënë Hill për televizionin N1.
Paralajmërimet e Listës Serbe për largim nga institucionet e Kosovës kanë ardhur pas vendimit të autoriteteve të Kosovës për suspendimin e drejtorit të Policisë së Kosovës për rajonin e veriut, Nenad Gjuriq, i cili ka refuzuar që të zbatojë vendimin e Qeverisë së Kosovës për riregjistrimin e makinave që kanë targa të lëshuara nga Serbia në RKS – Republika e Kosovës.
Hill, po ashtu, ka thënë se SHBA-ja është në linjë me BE-në edhe sa i përket kërkesës ndaj Qeverisë së Kosovës për shtyrjen e zbatimit të vendimit për riregjistrimin e makinave me targa ilegale serbe në RKS. Kryeministri i Kosovës, u ka bërë thirrje serbëve që të mos braktisin institucionet e Kosovës, pasi në këtë mënyrë dobësojnë shërbimet për qytetarët. Për dallim nga Kosova, Serbia e ka mbështetur vendimin e Listës Serbe.
Plani për targat
Prej 1 nëntorit, Qeveria e Kosovës ka nisur të zbatojë planin e saj – në tri faza – për riregjistrimin e makinave me targa të lëshuara nga Serbia. Faza e parë përfshin qortimin e shoferëve, e dyta parasheh gjobë deri në 150 euro për ata shoferë, dhe e treta targa provuese. Zbatimi i këtij plani pritet të përfundojë më 21 prill dhe, nga ajo datë, në qarkullim do të lejohen vetëm makina me targa RKS.
Besohet se në Kosovë janë rreth 10.000 makina me targa serbe. Shtetet e Bashkuara dhe Bashkimi Evropian kanë shprehur zhgënjim pse Qeveria e Kosovës nuk ka vepruar në përputhje me kërkesën e tyre për shtyrje 12-mujore të vendimit për targat.
Thirrjet për formim të Asociacionit
Ambasadori amerikan i është bashkuar BE-së edhe në thirrjet ndaj Kosovës për Asociacionin e komunave me shumicë serbe. “Kjo nënkupton edhe fillimin e menjëhershëm të negociatave për themelimin e Asociacionit të komunave me shumicë serbe, një obligim ligjor për Kosovën. Dështimi i vazhdueshëm i Kosovës për të zbatuar këtë obligim, dëmton sundimin e ligjit dhe reputacionin e Kosovës”, – ka thënë mes tjerash Hill. Kosova dhe Serbia kanë arritur marrëveshje për Asociacionin më 2013 dhe më pas më 2015 mbi parimet për themelimin e tij.
Po më 2015, Gjykata Kushtetuese e Kosovës ka gjetur se marrëveshja nuk është në harmoni të plotë me Kushtetutën. Serbia kërkon që Kosova të zbatojë marrëveshjet e arritura, por Qeveria e Kosovës është deklaruar kundër një asociacioni njëetnik. Pankarta në Mitrovicën Veriore ku shkruan “Mirë se erdhët në komunitetin e komunave serbe”
Kosova dhe Serbia kanë nisur negociatat për normalizimin e marrëdhënieve më 2011, me ndërmjetësimin e Bashkimit Evropian. Procesi i negociatave pritet të përfundojë me marrëveshje ligjërisht të detyrueshme. Ndonëse Kosova deklaron se kjo marrëveshje duhet të përfshijë njohjen e ndërsjellë, Serbia nuk pranon, duke insistuar në “zgjidhje kompromisi”. /REL
“‘ Kosova te pranoj obligimet” .. pra te pranoje ‘ associationin e krahinave serbe”.
Ja ku arritem ne situaten e Bosnjes !
Nje politike e zgjuar dhe e pergjegjshme nuk eshte vetem te zgjidhesh problemet e dites, por te parandalosh dhe ato te te ardhmes.
Ne keta politikane na kane munguar, ose i kemi pasur dhe nuk i kemi kuptuar.
BE ka si autoritet te politikes se jashtme Borrell nga Spanja.
Te derguar si nfermjetes per te zgjidhur problemet mes Kosoves e Serbise, Lajcak nga Sllovakia.
Te dyja keto vende nuk e njohin Kosoven si shtet te pavarur por si pjese te Serbise.
Sa shprese ka qe keta tipat do te gjejne nje zgjidhje te favorshme per shqiptaret e Kosoves?
Nuk vendosin as Borrel dhe as Lajcak, por Franca dhe Gjermania. Dy forca qe njera pale eshte me kosoven dhe pala tjeter kundra saj. Fati yne i madh eshte qe USA eshte me ne. Megjithate nese atyre ju propozohet nje pazar i majme, mos ki asnje iluzjon qe do ti shesin kosovaret.
Prandaj ne duhet te dilnim prej kohesh nga kjo arene ku perplasen interesat e ‘ te medhejve’ .
E kishim rastin dhe e shkelem , e perdhosem.
Nese arrnim te shkembenim teritoret me kushtin e njohjes se ndersjellte dhe shkembim qe ti kenaqte te dy palet , atehere nuk do ishim ne meshiren e te tjereve.