Tottenham humbi në shtëpi përballë Liverpool dhe pëson disfatën e tretë në katër ndeshjet e fundit. Mohamed Salah, me një dygolësh, i ka dhënë Reds fitoren e parë në transfertë në kampionat. Liverpool lë pas kështu dy humbjet e fundit radhazi. Spurs nuk i mjaftoi goli i Harry Kane në minutën e 70-të. Një ndeshje plot emocione si në fushë ashtu edhe jashtë saj. Antonio Conte në fund u tërbua dhe u fut në zonën teknike të Klopp, duke u grindur me Lijnders. Më pas, një gjest zemërimi i kushtoi atij kartonin e verdhë.
19 minuta nga fundi, topi doli jashtë dhe është rivënie anësore për Liverpool. Antonio Conte dëshironte që Reds të rifillonin lojën menjëherë, por e ekzagjeroi duke bërë që të ndodhte gjithçka. Robertson nuk mund ta riluajë topin në lojë, sepse askush nuk e ktheu topin që doli pak më parë. Trajneri i Spurs, në atë moment, doli nga vetja.
Conte u kthye nga pankina e kundërshtarit dhe dalloi se Pep Lijnders, ndihmësi i Klopp, kishte një tjetër top në duar. Lijnders nuk ia dorëzoi topin Robertsonit për të humbur pak kohë, por tekniku italian nuk duroi më. Conte u fut në zonën teknike të Reds, iu afrua asistentit të Klopp dhe i zemëruar i mori topin nga duart holandezit.
Antonio Conte is FIRED UP! 😳😠 pic.twitter.com/serPNAyYYe
— Sky Sports Premier League (@SkySportsPL) November 6, 2022
CONTE: “KAM RESPEKT TË MADH PËR KLOPP E STAFIN E TIJ”
Trajneri i Liverpool ngre duart për të protestuar dhe tërhequr vëmendjen e arbitrit dhe ndërkohë, mes dy pankinave shpërthen një sherr i zjarrtë. Në fund, arbitri paralajmëroi Conte. 53-vjeçari, pas ndeshjes, tha se kishte respekt për Klopp dhe stafin e tij. Por gjithashtu, ai shprehu zhgënjimin e tij për rezultatin, të cilin e konsideron të padrejtë: “Kam respekt të madh për Klopp dhe stafin e tij. Është e vështirë të shpjegosh humbjen e sonte, ne meritonim shumë më tepër. Në pjesën e dytë luajtëm shumë mirë. Portieri i tyre bëri disa pritje të bukura dhe ne goditëm shtyllën dhe traversën. Mendoj se rezultati ishte i padrejtë”.