Pas arritjes së marrëveshjes për targat ilegale serbe mes Kosovës dhe Serbisë më 23 nëntor, kryediplomati evropian, Josep Borell, paralajmëroi se në ditët në vijim do t’i ftojë liderët e të dyja shteteve në Bruksel për të diskutuar për “Propozimin e Brukselit”, të mbështetur nga Franca dhe Gjermania. Por, çka dihet deri më tani lidhur me këtë propozim?
Që nga vera nga zyrtarët e Kosovës dhe Serbisë është duke qarkulluar një dokument që u quajt plani franko-gjerman. Sipas zyrtarëve të Bashkimit Evropian, ky propozim ka për qëllim normalizimin e raporteve mes të Kosovës dhe Serbisë. Ky dokument është një propozim i mbështetur nga Franca dhe Gjermania. Zyrtarët e BE-së e quajnë një ‘propozim europian’. Derisa dokumenti nuk ka dalë zyrtarisht në opinion, nga goja e politikanëve në Kosovë, e po ashtu edhe në Serbi kanë dalë detaje të rëndësishme.
Çfarë thanë deri më tani zyrtarët në Kosovë lidhur me planin franko-gjerman?
Më i hapuri për propozimin franko-gjerman ka qenë kryetari i Kuvendit të Kosovës, Glauk Konjufca. Në një intervistë për Klan Kosovën, ai deklaroi se “esenca e propozimit është se Serbia heq dorë prej Kosovës”.
“[Propozimi] ndërtohet mbi tri principe. E drejta e barabartë mes shteteve, respektimi reciprok i sovranitetit dhe është e drejta e palëve për vetëvendosje”, tha Konjufca.
Ai e quajti bazë të shëndoshë këtë propozim. Ai tha se nëse Serbia pajtohet që të respektojë sovranitetin dhe të drejtën e vetëvendosjes, atëherë, sipas tij, “kjo është më e rëndësishme sesa njohja verbale [nga Serbia]”.
Por, Konjufca shprehu edhe rezerva sa i takon këtij propozimi. Kjo pasi mes tjerash tha se ai obligon Kosovën që të respektojë të gjitha marrëveshjet e arritura deri më tani.
Për disa javë rresht Qeveria dhe Presidenca e Kosovës nuk e pranuan ekzistencën e propozimit franko-gjerman. Megjithatë ekzistenca e një drafti ishte publikuar në media.
“Aty, në dokument, Serbia ka për të pranuar gjithçka që prodhon Kosova. Prej pasaportave e duke përfshirë edhe targat”, tha kryetari i Kuvendit, Glauk Konjufca.
Më 10 nëntor, presidentja e Kosovës, Vjosa Osmani-Sadriu, tha se ky propozim “shërben si bazë e mirë për diskutime të mëtejshme [në dialogun Kosovë-Serbi]”.
Por, edhe pse nuk ka publikuar ndonjë draft zyrtar, Qeveria e Kosovës i është përgjigjur Bashkimit Evropian me komentet rreth propozimit.
Kryeministri i Kosovës, Albin Kurti vazhdimisht po i shmangë komentet sa i takon përmbajtjes së propozimit franko-gjerman. Ai për të ishte i interesuar të diskutonte të hënën në takim me presidentin e Serbisë, Aleksandar Vuçiq, në Bruksel.
Këtë ditë, ky propozim, sipas tij, nuk ishte fare në tryezë pasi lehtësuesit e dialogut, përfaqësuesi i Lartë i për Politikë të Jashtme i BE-së, Josep Borrell dhe i emëruari i BE-së për dialogun Kosovë – Serbi, Mirosllav Lajçak, “e hoqën nga diskutimi për t’ia përshtatur qëllimin Serbisë” – diskutimin vetëm për targa.
“Qëllimi i madh u hoq nga agjenda. Nevoja e madhe për propozimin evropian me mbështetje franko-gjermane u zhduk nga tavolina duke iu përshtatur qëllimit të Serbisë. Presidenti Vuçiç kishte ardhur në Bruksel jo për propozimin e BE-së por për targat”, deklaroi Kurti të mërkurën.
Zëdhënësi i BE-së për Politikë të Jashtme dhe Siguri, Peter Stano, më herët ka thënë se është i pavërtetë çfarëdo pretendimi se Bashkimi Evropian është duke hequr dorë nga propozimi për normalizim të marrëdhënieve mes Kosovës dhe Serbisë.
Kurti më 23 nëntor, para arritjes së marrëveshjes mbi targa, kërkoi që plani i Francës dhe Gjermanisë, i përkrahur nga BE-ja, të vendoset në tryezë “një orë e më parë”.
Edhe pse i përfshirë aktivisht në negociata, zëvendëskryeministri i Kosovës, Besnik Bislimi, në një intervistë për Radion Evropa e Lirë, më 1 nëntor, tha se propozimi franko-gjerman parasheh zgjidhjen e kontesteve Kosovë-Serbi në dy faza. Këto faza zgjidhin konfliktet: shumicën menjëherë – të tjerat më vonë.
“Është një ide që raportet Kosovë-Serbi të zgjidhen në dy faza ku një pjesë e madhe e kontesteve do të zgjidheshin tani kur një pjesë shumë e vogël që ata thonë është 1 për qind por që ne besojmë se është më shumë se 1 për qind do të liheshin për një periudhë të mëvonshme”, deklaroi Bislimi.
Çfarë tha Serbia?
Më të hapur për këtë plan ishin në Serbi. Të parët, zyrtarët serbë thanë se plani nuk ishte shumë në favor të Serbisë. Presidenti Aleksandar Vuçiq, më 8 tetor, tha se dialogu po ndryshonte në esencë pasi tashmë në tavolinë ishte një propozim i dy fuqive të mëdha si Gjermania dhe Franca. Fillimisht Vuçiç tha se Franca dhe Gjermania, kishin propozuar që Serbia të lejojë Kosovën të anëtarësohet në institucione dhe organizata ndërkombëtare, përfshirë Kombet e Bashkuara. Kjo do të bëhej në këmbim të anëtarësimit të Serbisë në Bashkimin Evropian.
“Për Serbinë, për shkak të Kushtetutës, por jo vetëm për shkak të saj, është e papranueshme që Kosova të bëhet anëtare e OKB-së. Kjo do të bartte pasojat e veta”, u shpreh Vuçiq.
Vuçiq tha se nuk e ka pranuar e as refuzuar planin franko-gjerman.
Ministri i jashtëm serb, Ivica Daçiq, tha se propozimi franko-gjerman parasheh që pavarësia e Kosovës të jetë punë e kryer. Ai shtoi se këtë Serbia nuk mund të pranojë.
Çfarë thotë drafti i publikuar në media?
Portali informativ Euractiv, publikoi më 9 nëntor një dokument, për të cilin tha se është draft i propozimit franko-gjerman. Dokumenti i publikuar përmban 9 nene. Ai fillon me pajtim për marrëdhënie normale mes Kosovës dhe Serbisë. Ai vijon me angazhimin për integrim në BE, zgjidhjen e mospajtimeve dhe respektimin e integritetit territorial, respektimin e subjektivitetit të njëra-tjetrës, respektimin e ndërsjellë të juridiksionit, zotimin për rritje të bashkëpunimit në fusha të ndryshme përfshirë ekonomi, shkencë, gjyqësor, fushën e mbrojtjes etj. E, po ashtu, edhe shkëmbimin e misioneve të përhershme. E fundit shihet pajtimi i palëve që kjo marrëveshje nuk ndikon në marrëveshjet e arritura më parë.
Autenticiteti i këtij dokumenti nuk ka mundur të verifikohet nga Radio Evropa e Lirë. Ndërkombëtarët e përfshirë në dialogun në mes të Kosovës dhe Serbisë, Borrell dhe Lajçak, përveç se konfirmuan ekzistencën e planit, thanë se ai ishte propozim i tyre. Ai ishte mbështetur nga Gjermania dhe Franca në veçanti.
“Kemi marrë përgjigje nga të dyja palët. Jemi duke i studiuar dhe mendoj se është një shkas i mirë. Ai duhet të shfrytëzohet për të arritur normalizimin e raporteve ndërmjet Prishtinës dhe Beogradit”, kishte deklaruar më parë Josep Borrell.
Dialogu në mes të Prishtinës dhe Beogradit nuk është duke shkuar ashtu siç ishte planifikuar. Kohë pas kohe janë duke u shfaqur kriza si kjo e fundit për çështjen e targave. Tensionet në komunat Zveçan, Leposaviq, Zubin Potok dhe Mitrovicë e Veriut e kanë penguar dialogun.
Aktualisht, ka ngecje edhe për shkak se Kosova nuk ka ndërmarrë ndonjë hap drejt themelimit të Asociacionit të komunave me shumicë serbe. Kjo ka qenë kërkesë e vazhdueshme e Serbisë. Borrell më 23 nëntor, pas arritjes së marrëveshjes për targa, tha se “palët e kuptojnë se të gjitha marrëveshjet e kaluara të arritura në bisedime duhet të zbatohen”.
Kosova dhe Serbia kanë nisur negociatat për normalizimin e marrëdhënieve më 2011. Takimet bëhen me ndërmjetësimin e Bashkimit Evropian. Procesi i negociatave pritet të përfundojë me marrëveshje ligjërisht të detyrueshme. Ndonëse Kosova deklaron se kjo marrëveshje duhet të përfshijë njohjen e ndërsjellë. Serbia nuk pranon, duke insistuar në “zgjidhje kompromisi”./REL